તહેવારોની સિઝનમાં મોંઘવારીનો વધુ એક ઝટકો લાગ્યો છે. ખાદ્યતેલ બાદ હવે સુકામેવા, મસાલા, કઠોળ, ચોખા અને ખાંડના ભાવમાં વધારો થતાં સામાન્ય પરિવારોનું બજેટ ખોરવાઈ શકે છે. ખાસ કરીને દિવાળીની ખરીદી અને ગિફ્ટ બોક્સ તૈયાર કરાવવા માટે ગ્રાહકોએ વધુ નાણાં ખર્ચવા પડશે.
બજારમાં પિસ્તાના ભાવ પ્રતિ કિલો રૂ.1,200થી વધીને રૂ.1,800થી રૂ.1,900 સુધી પહોંચી ગયા છે. કાજુના ભાવ રૂ.1,000થી રૂ.1,100, જ્યારે અખરોટની ગિરીના ભાવ રૂ.1,350થી વધીને રૂ.1,500 પ્રતિ કિલો થયા છે. બદામ ખરીદવા માટે પણ ગ્રાહકોએ પ્રતિ કિલો રૂ.300 વધુ ચૂકવવા પડી રહ્યા છે.
મસાલામાં જીરાના ભાવ રૂ.250થી વધીને રૂ.300થી રૂ.350, ધાણાના રૂ.230થી વધીને રૂ.280 અને હળદરના રૂ.190થી વધીને રૂ.250 પ્રતિ કિલો થયા છે. ખાંડના ભાવ રૂ.52થી વધીને રૂ.58 પ્રતિ કિલો થયા છે. ચોખા અને તુવેરદાળના ભાવમાં પણ વધારો નોંધાયો છે.
ભાવવધારાની અસર દિવાળીની ભેટસોગાદો પર પણ જોવા મળી શકે છે. સુકામેવાના ભાવ વધતાં ગિફ્ટ બોક્સમાં સુકામેવાનું પ્રમાણ ઘટાડવું પડે અથવા બોક્સની કિંમત વધારવી પડે તેવી સ્થિતિ સર્જાઈ શકે છે. પરિણામે તહેવારોમાં ખરીદી કરવી સામાન્ય ગ્રાહકો માટે વધુ મોંઘી બનવાની શક્યતા છે.
