શૈક્ષણિક વર્ષ 2025-26માં વિદેશમાં ઉચ્ચ અભ્યાસ કરવા ઇચ્છતા ભારતીય વિદ્યાર્થીઓને વિવિધ દેશોની યુનિવર્સિટીઓમાંથી કુલ ₹125 કરોડની સ્કોલરશિપ મળી છે. વધતી ટ્યુશન ફી અને રહેવાના ખર્ચ વચ્ચે આ સ્કોલરશિપ વિદ્યાર્થીઓ માટે મોટી આર્થિક રાહત બની છે.
સ્કોલરશિપમાં યુકેનો સૌથી મોટો હિસ્સો છે. કુલ રકમમાંથી ₹113 કરોડથી વધુ એટલે કે 90%થી વધુ સ્કોલરશિપ બ્રિટનની યુનિવર્સિટીઓએ આપી છે. ત્યારબાદ ઓસ્ટ્રેલિયા ₹3.95 કરોડ, UAE ₹3.86 કરોડ અને આયર્લેન્ડ ₹1.20 કરોડ સાથે આગળ છે.
યુકેમાં વાર્ષિક ટ્યુશન ફી ₹11 લાખથી ₹48 લાખ સુધી પહોંચતી હોવાથી ₹6થી ₹19 લાખ સુધીની સ્કોલરશિપ વિદ્યાર્થીઓને એજ્યુકેશન લોનનો બોજ ઘટાડવામાં મદદરૂપ થઈ રહી છે.
અમેરિકા-કેનેડા જેવા દેશોમાં વિઝા અને ઇમિગ્રેશનના નિયમો કડક બનતા ભારતીય વિદ્યાર્થીઓ હવે સ્કોલરશિપને પ્રાથમિકતા આપી નવા દેશો અને યુનિવર્સિટીઓ તરફ નજર કરી રહ્યા છે. આગામી સમયમાં વિદેશ અભ્યાસ માટે યુનિવર્સિટી પસંદગીમાં સ્કોલરશિપ મહત્વની ભૂમિકા ભજવશે.
