ઉત્તરપ્રદેશ, બિહાર, હરિયાણા અને પંજાબમાં વરસાદી માહોલ; હિમાચલ, ઉત્તરાખંડ અને જમ્મુ-કાશ્મીરમાં હિમવર્ષા
આંધ્રપ્રદેશના દરિયાકાંઠાના વિસ્તારોમાં આવેલા ભીષણ વાવાઝોડાની અસર ઉત્તર અને મધ્ય ભારતના અનેક રાજ્યોમાં જોવા મળી રહી છે. બદલાયેલા હવામાનને પગલે ઉત્તરપ્રદેશ, દિલ્હી-NCR, બિહાર, હરિયાણા અને પંજાબ સહિતના વિસ્તારોમાં વરસાદ પડ્યો છે. વરસાદ અને ઠંડા પવનોને કારણે તાપમાનમાં ઘટાડો થતાં વાતાવરણ ઠંડુગાર બન્યું છે.
દિલ્હી-NCR સહિત અનેક વિસ્તારોમાં વરસાદ
દિલ્હી, નોઈડા, ગાઝિયાબાદ અને ગુરુગ્રામ સહિતના વિસ્તારોમાં રાતથી વરસાદનો દોર ચાલુ રહ્યો હતો. ઉત્તરપ્રદેશ અને હરિયાણાના અનેક જિલ્લાઓમાં પણ વરસાદી ઝાપટાં પડ્યાં હતાં. ઠંડા પવનો સાથે વરસાદ થતાં લોકોને ગરમીમાંથી રાહત મળી હતી અને ઠંડીનો અનુભવ વધ્યો હતો.
પંજાબના અનેક વિસ્તારોમાં પણ ભારે પવન સાથે વરસાદ પડ્યો હતો. જ્યારે બિહારમાં ગાઢ વાદળો છવાઈ જતાં અનેક જિલ્લાઓમાં મધ્યમથી ભારે વરસાદ નોંધાયો હતો. બદલાયેલા વાતાવરણને કારણે લોકોએ ગરમ કપડાં બહાર કાઢવાની ફરજ પડી છે.
પહાડી વિસ્તારોમાં હિમવર્ષા, ઠંડીમાં વધારો
હિમાચલ પ્રદેશ, ઉત્તરાખંડ અને જમ્મુ-કાશ્મીરના પહાડી વિસ્તારોમાં હિમવર્ષા થઈ રહી છે. નીચાણવાળા વિસ્તારોમાં વરસાદ અને ઠંડા પવનોને કારણે તાપમાનમાં ઘટાડો થયો છે. આ વિસ્તારોમાં ઠંડીનું પ્રમાણ વધતાં શિયાળાની શરૂઆતનો અનુભવ થવા લાગ્યો છે.
વાવાઝોડા અને પશ્ચિમી વિક્ષેપની સંયુક્ત અસર
હવામાન વૈજ્ઞાનિકોના જણાવ્યા અનુસાર, બંગાળની ખાડી તરફથી આવી રહેલા ભેજ અને પશ્ચિમી વિક્ષેપની અસરને કારણે ઉત્તર ભારતના હવામાનમાં મોટો ફેરફાર જોવા મળ્યો છે. છેલ્લા 24થી 48 કલાક દરમિયાન અનેક રાજ્યોમાં વરસાદી માહોલ સર્જાયો છે. આંધ્રપ્રદેશના વાવાઝોડાની અસર સાથે હવામાનની અન્ય પ્રણાલીઓના જોડાણને કારણે મેદાની અને પહાડી વિસ્તારોમાં વરસાદ તથા ઠંડીમાં વધારો થયો છે.
