ઉત્તર ભારતમાં હવામાનમાં પલટો : કેદારનાથમાં બરફવર્ષા વચ્ચે પણ શ્રદ્ધાળુઓનો ઉત્સાહ યથાવત્
ઉત્તર ભારતનાં વિવિધ રાજ્યોમાં હવામાનમાં પલટો આવતાં વરસાદ અને હિમવર્ષાનો દોર શરૂ થયો છે. ચારધામ યાત્રા હવે અંતિમ તબક્કામાં પહોંચી રહી છે ત્યારે કેદારનાથ ધામમાં હિમવર્ષા થતાં સમગ્ર મંદિર પરિસર બરફની સફેદ ચાદરમાં ઢંકાઈ ગયું છે. બરફથી આચ્છાદિત પર્વતો અને મંદિરનું મનમોહક દૃશ્ય શ્રદ્ધાળુઓમાં આકર્ષણનું કેન્દ્ર બન્યું છે.
હિમવર્ષાને કારણે કેદારનાથમાં ઠંડીનું પ્રમાણ વધ્યું છે. જોકે, પ્રતિકૂળ હવામાન વચ્ચે પણ શ્રદ્ધાળુઓનો ઉત્સાહ ઓછો થયો નથી. ભાવિકો ‘બાબા કેદારનાથના જયજયકાર’ સાથે મંદિરે પહોંચી દર્શન કરી આશીર્વાદ મેળવી રહ્યા છે.
હિન્દુ ધર્મની પવિત્ર ચારધામ યાત્રાના સમાપનનું સમયપત્રક જાહેર થઈ ચૂક્યું હોવા છતાં યાત્રાળુઓનો પ્રવાહ યથાવત્ છે. વરસાદ અને હિમવર્ષા વચ્ચે પણ મોટી સંખ્યામાં શ્રદ્ધાળુઓ બાબા કેદારના દર્શન માટે ઉમટી રહ્યા છે.
