શિક્ષિત વિસ્તારોમાં 70-75% જ્યારે ગુનેગાર વિસ્તારોમાં 92% મત મળ્યાનો દાવો; ‘હું તેમની પ્રવૃત્તિઓનું સમર્થન કરતો નથી’
નાગપુર: કેન્દ્રીય માર્ગ પરિવહન અને રાજમાર્ગ મંત્રી નીતિન ગડકરી પોતાના બેબાક નિવેદનોને લઈને ફરી ચર્ચામાં આવ્યા છે. નાગપુરમાં યોજાયેલા એક કાર્યક્રમ દરમિયાન ગડકરીએ ચૂંટણીમાં મળેલા મત અંગે વાત કરતાં કહ્યું કે તેમને શિક્ષિત વિસ્તારોની સરખામણીએ અંડરવર્લ્ડ, ક્રિમિનલ અને રેડ લાઈટ વિસ્તારોમાંથી વધુ મત મળ્યા હતા. ગડકરીનું આ નિવેદન હાલ ચર્ચાનો વિષય બન્યું છે.
શિક્ષિત વિસ્તારોમાં 70-75%, ગુનેગાર વિસ્તારોમાં 92% વોટ
કાર્યક્રમમાં ગડકરીએ જણાવ્યું હતું કે શહેરના મોટા અને શિક્ષિત વિસ્તારોમાં તેમને કુલ મતદાનના આશરે 70થી 75 ટકા મત મળ્યા હતા. જ્યારે અંડરવર્લ્ડ, ગુનેગાર અને રેડ લાઈટ વિસ્તારોમાં તેમને આશરે 92 ટકા મત મળ્યા હોવાનું તેમણે કહ્યું હતું.
ગડકરીએ હળવા અંદાજમાં જણાવ્યું કે નાગપુરમાં અંડરવર્લ્ડ અને અસામાજિક પ્રવૃત્તિઓ સાથે જોડાયેલા લોકોમાંથી મોટી સંખ્યામાં લોકો તેમના સમર્થક રહ્યા છે.
‘હું તેમના કામનું સમર્થન કરતો નથી’
પોતાના નિવેદનને સ્પષ્ટ કરતાં ગડકરીએ કહ્યું કે કોઈ વ્યક્તિ તેમને મત આપે છે તેનો અર્થ એવો નથી કે તેઓ તેની ગેરકાયદેસર કે અસામાજિક પ્રવૃત્તિઓનું સમર્થન કરે છે.
તેમણે જણાવ્યું કે આ વિસ્તારોમાં રસ્તા સહિતના વિકાસકામો કરાવ્યા અને સામાજિક કાર્યો કર્યા હોવાથી ત્યાંના લોકોએ તેમને મત આપ્યો હોઈ શકે છે. ગડકરીએ સ્પષ્ટતા કરી કે તેમના આવા લોકો સાથે સંપર્ક હોવાનો અર્થ તેમના કામોને સમર્થન આપવાનો નથી.
ફરી એકવાર ગડકરીનું નિવેદન ચર્ચામાં
નીતિન ગડકરી પોતાના સ્પષ્ટવક્તા અને બેબાક નિવેદનો માટે જાણીતા છે. તેઓ અનેક પ્રસંગોએ પોતાની વાત કોઈ પણ પૂર્વધારણા વિના રજૂ કરતા જોવા મળ્યા છે. તેમના તાજેતરના નિવેદનથી ફરી રાજકીય અને સામાજિક વર્તુળોમાં ચર્ચા શરૂ થઈ છે.
આ અગાઉ પણ ગડકરીએ એક કાર્યક્રમ દરમિયાન કહ્યું હતું કે તેઓ લાંબા સમયથી ઘણું કામ કરી ચૂક્યા છે અને હવે નવી પેઢીને તક મળવી જોઈએ. તેમના આ નિવેદનની પણ તે સમયે ભારે ચર્ચા થઈ હતી.
