ટેક-ઓફના 50 મિનિટ બાદ એન્જિન-1માં ઓઇલ લેવલ અને પ્રેશર ઘટ્યું; ક્રૂએ સમયસર નિર્ણય લઈ વિમાનને કોચી પરત લાવ્યું
કોચી: કેરળના કોચી એરપોર્ટથી અબુ ધાબી જતી એર ઈન્ડિયા એક્સપ્રેસની ફ્લાઇટમાં આકાશમાં જ ટેકનિકલ કટોકટી સર્જાતા મુસાફરોમાં ગભરાટ ફેલાયો હતો. ફ્લાઇટે ઉડાન ભર્યાના આશરે 50 મિનિટ બાદ લગભગ 36 હજાર ફૂટની ઊંચાઈએ વિમાનના એક એન્જિનમાં ઓઇલનું સ્તર અને પ્રેશર ઝડપથી ઘટવા લાગ્યું હતું.
પરિસ્થિતિની ગંભીરતા સમજીને ક્રૂ મેમ્બર્સે તાત્કાલિક ઈમરજન્સી પ્રોટોકોલ હેઠળ કાર્યવાહી શરૂ કરી હતી. એન્જિન-1નો ઓઇલ સપ્લાય બંધ કરીને વિમાનને અબુ ધાબી લઈ જવાને બદલે સુરક્ષાના હેતુથી ફરી કોચી તરફ વાળવાનો નિર્ણય લેવામાં આવ્યો હતો. આખરે વિમાનનું કોચી એરપોર્ટ પર સુરક્ષિત રીતે ઈમરજન્સી લેન્ડિંગ કરાવવામાં આવ્યું હતું.
36 હજાર ફૂટની ઊંચાઈએ ઘટ્યું ઓઇલ પ્રેશર
મળતી માહિતી મુજબ એર ઈન્ડિયા એક્સપ્રેસનું બોઇંગ 737 વિમાન, ફ્લાઇટ નંબર IX 415, કોચીથી અબુ ધાબી માટે રવાના થયું હતું. ઉડાન દરમિયાન ક્રૂના ધ્યાનમાં આવ્યું કે એન્જિન-1માં ઓઇલનું સ્તર ઝડપથી ઘટી રહ્યું હતું અને ઓઇલ પ્રેશર પણ ઓછું થઈ રહ્યું હતું.
જોખમને ધ્યાનમાં રાખીને એન્જિન-1નો ઓઇલ સપ્લાય બંધ કરવામાં આવ્યો હતો. આ દરમિયાન વિમાન એક એન્જિન પર ઉડાન ચાલુ રાખીને સુરક્ષિત રીતે પરત ફર્યું હતું.
FORDEC ચેક બાદ કોચી પરત ફરવાનો નિર્ણય
ટેક-ઓફ બાદ આશરે 50 મિનિટે સમસ્યા સામે આવ્યા બાદ ક્રૂએ FORDEC ચેક હાથ ધર્યો હતો. મુસાફરોની સુરક્ષાને પ્રાથમિકતા આપીને અબુ ધાબી સુધીની ઉડાન ચાલુ રાખવાને બદલે વિમાનને કોચી પરત લાવવાનો નિર્ણય લેવામાં આવ્યો હતો.
ક્રૂની સમયસૂચકતા અને યોગ્ય નિર્ણયના કારણે મોટી દુર્ઘટના ટળી હોવાનું માનવામાં આવી રહ્યું છે. ફ્લાઇટમાં સવાર તમામ મુસાફરો સુરક્ષિત હોવાનું જણાવાયું છે.
લેન્ડિંગ બાદ વિમાન તપાસ માટે મોકલાયું
કોચી એરપોર્ટ પર લેન્ડિંગ બાદ વિમાનને ટેકનિકલ તપાસ માટે ખસેડવામાં આવ્યું છે. ખામીનું ચોક્કસ કારણ જાણવા માટે તપાસ શરૂ કરવામાં આવી છે અને તપાસ પૂર્ણ ન થાય ત્યાં સુધી વિમાને ફરી ઉડાન ભરી નથી.
આ ટેકનિકલ ખામી પાછળનું ચોક્કસ કારણ શું હતું તે અંગે હજુ સ્પષ્ટતા થઈ નથી. એરલાઇન અથવા એરપોર્ટ ઓથોરિટી તરફથી આ ઘટના અંગે સત્તાવાર વિગતવાર નિવેદન જાહેર થવાનું બાકી છે.
