ચોમાસામાં ગુજરાતના અનેક ધોધ સક્રિય બનતા પ્રવાસીઓની ભીડ વધી છે. ગિરમાળ, ગીરા, ઝાંઝરી, નિનાઈ, જમજીર અને ઝરવાણી જેવા ધોધોમાં પાણીનો પ્રવાહ વધ્યો છે. આ સ્થિતિમાં અકસ્માતનું જોખમ વધતાં તંત્ર દ્વારા સાવચેતીના પગલાં લેવામાં આવ્યા છે.
ઝાંઝરી ધોધ પર 6 સપ્ટેમ્બર સુધી પ્રતિબંધ
અરવલ્લી જિલ્લા વહીવટી તંત્રે 9 જુલાઈથી 6 સપ્ટેમ્બર સુધી ઝાંઝરી ધોધથી ગંગેશ્વર મહાદેવ ચેકડેમ સુધીનો આશરે 5 કિમી વિસ્તાર પ્રતિબંધિત જાહેર કર્યો છે.
આ વિસ્તારમાં નદીમાં નહાવા, પાણીના કિનારે જવા અને જોખમી ખડકો પર ચઢવા પર પ્રતિબંધ રહેશે. તેમજ ખડકો પર જઈને સેલ્ફી, ફોટોગ્રાફી કે વીડિયો બનાવવાની પણ મનાઈ કરવામાં આવી છે.
તહેવારો અને જાહેર રજાઓ દરમિયાન પ્રવાસીઓની સંખ્યા વધવાની શક્યતાને ધ્યાનમાં રાખીને તંત્રએ આ નિર્ણય લીધો છે. ચોમાસા દરમિયાન પાણીનો પ્રવાહ અચાનક વધી શકે છે, જેથી પ્રવાસીઓની સુરક્ષા માટે આ પ્રતિબંધ લાગુ કરવામાં આવ્યો છે.
