રાજકોટઃ આગામી વર્ષે યોજાનારી વાઈબ્રન્ટ ગુજરાત સમિટને લઈને રાજ્ય સરકારે તૈયારીઓ શરૂ કરી દીધી છે. વિદેશી કંપનીઓને ગુજરાતમાં રોકાણ માટે આમંત્રિત કરવા મુખ્યમંત્રી ભૂપેન્દ્ર પટેલ અમેરિકા-કેનેડાના પ્રવાસે છે. પ્રવાસ દરમિયાન તેઓ સાનફ્રાન્સિસ્કો પહોંચ્યા હતા, જ્યાં ભારતીય દૂતાવાસના અધિકારીઓ તેમજ સ્થાનિક ભારતીય અને ગુજરાતી સમુદાય દ્વારા તેમનું સ્વાગત કરવામાં આવ્યું હતું.
મુખ્યમંત્રી ભૂપેન્દ્ર પટેલ અમેરિકા પ્રવાસ દરમિયાન ન્યૂયોર્ક અને વોશિંગ્ટનની મુલાકાત લેશે. ત્યારબાદ તેઓ કેનેડાના ટોરન્ટો જશે. તેમની સાથે રાજ્ય સરકારના ઉચ્ચ અધિકારીઓનું પ્રતિનિધિમંડળ પણ પ્રવાસમાં જોડાયું છે.
સાનફ્રાન્સિસ્કો સહિત અમેરિકામાં વસતા ગુજરાતી ઉદ્યોગપતિઓ અને વેપારીઓ સાથે મુખ્યમંત્રી મુલાકાત કરશે. આ ઉપરાંત વિવિધ મલ્ટીનેશનલ કંપનીઓના વડાઓ સાથે બેઠક યોજી ગુજરાતમાં રોકાણ માટે આમંત્રણ આપવામાં આવશે.
મુખ્યમંત્રી સાથે મુખ્યમંત્રી કાર્યાલયના ઉચ્ચ અધિકારીઓ પણ જોડાયા છે, જેમાં સંજીવકુમાર અને વિક્રાંત પાંડેનો સમાવેશ થાય છે. વાઈબ્રન્ટ ગુજરાત સમિટ પૂર્વે વિદેશી રોકાણ આકર્ષવા માટે મુખ્યમંત્રીનો આ પ્રવાસ મહત્વપૂર્ણ માનવામાં આવી રહ્યો છે.
