અમેરિકાના પ્યુ રિસર્ચ સેન્ટરના આંતરરાષ્ટ્રીય સર્વેમાં ભારતની વૈશ્વિક છબીને લઈને મહત્વના તારણો સામે આવ્યા છે. સર્વે મુજબ વિશ્વના 45% લોકો ભારત અંગે સકારાત્મક અભિપ્રાય ધરાવે છે. 2023 બાદ અનેક યુરોપિયન દેશોમાં ભારત પ્રત્યે સકારાત્મક વલણ વધ્યું છે.
જર્મનીમાં 2023માં 47% લોકો ભારતને સારી નજરે જોતા હતા, જ્યારે હવે આ આંકડો વધીને 63% થયો છે. ભારતના પડોશી દેશોમાં પણ મોટો તફાવત જોવા મળ્યો છે. શ્રીલંકામાં 79% લોકો ભારતને અનુકૂળ માને છે, જ્યારે પાકિસ્તાનમાં માત્ર 7% લોકોનો અભિપ્રાય સકારાત્મક છે.
કેન્યા અને બ્રિટનમાં પણ ભારત અંગે સકારાત્મક અભિપ્રાય ધરાવતા લોકોની સંખ્યા નોંધપાત્ર છે. જર્મની, ઇઝરાયેલ, ઇટાલી, સ્વીડન, જાપાન અને થાઇલેન્ડમાં પણ ભારત પ્રત્યે સારો અભિપ્રાય ધરાવતા લોકો બહુમતીમાં છે.
અમેરિકામાં ભારતની લોકપ્રિયતા ઘટી
અમેરિકામાં 45% લોકો ભારતને સારી નજરે જુએ છે, જ્યારે 50% લોકોનો અભિપ્રાય નકારાત્મક છે. 2023માં 51% અમેરિકનો ભારત અંગે સકારાત્મક અભિપ્રાય ધરાવતા હતા. એટલે અમેરિકામાં ભારતની સકારાત્મક રેટિંગમાં ઘટાડો નોંધાયો છે.
સર્વેમાં 30% અમેરિકનો માને છે કે ભારતનો વૈશ્વિક પ્રભાવ વધી રહ્યો છે, જ્યારે 54% લોકોના મતે ભારતના પ્રભાવમાં કોઈ ખાસ ફેરફાર થયો નથી.
ભારત-પાકિસ્તાન વચ્ચે અવિશ્વાસ યથાવત્
સર્વે મુજબ ભારત અને પાકિસ્તાનના લોકો એકબીજાને પોતાનું સૌથી મોટું ભૂ-રાજકીય જોખમ માને છે. 78% ભારતીયો પાકિસ્તાન પ્રત્યે નકારાત્મક અભિપ્રાય ધરાવે છે, જ્યારે 90% પાકિસ્તાનીઓ ભારતને નાપસંદ કરે છે.
વૈશ્વિક શક્તિઓ અંગે પણ બંને દેશોના અભિપ્રાય અલગ છે. ભારતીયો રશિયા અને અમેરિકાને વધુ અનુકૂળ રીતે જુએ છે, જ્યારે પાકિસ્તાનીઓમાં ચીન પ્રત્યે વિશ્વાસ વધુ જોવા મળે છે.
સર્વેનું તારણઃ વિશ્વમાં ભારતની છબી મોટાભાગે સકારાત્મક છે, પરંતુ અમેરિકા સહિત કેટલાક દેશોમાં ભારત પ્રત્યેના સકારાત્મક અભિપ્રાયમાં ઘટાડો નોંધાયો છે.
