રૂ. 1.39 લાખનો વિદેશી દારૂ અને કાર સહિત રૂ. 6.39 લાખનો મુદ્દામાલ કબજે, દારૂનો જથ્થો ક્યાંથી લવાયો અને કોને પહોંચાડવાનો હતો તે અંગે તપાસ
રાજકોટ: રાજકોટ-ચોટીલા હાઈવે પર માલિયાસણ ગામ નજીક PCBની ટીમે વોચ ગોઠવી સ્વીફ્ટ કારમાંથી વિદેશી દારૂની 528 બોટલ સાથે બે શખ્સોને ઝડપી પાડ્યા હતા. પોલીસે રૂ. 1.39 લાખની કિંમતનો દારૂ કબજે કરી કાર સહિત કુલ રૂ. 6.39 લાખનો મુદ્દામાલ જપ્ત કર્યો હતો. ઝડપાયેલા બંને શખ્સો સામે કાયદેસરની કાર્યવાહી હાથ ધરી દારૂના જથ્થા અંગે વધુ તપાસ શરૂ કરવામાં આવી છે.
દારૂબંધીના કાયદાનો કડક અમલ થાય તે માટે પોલીસ કમિશનર બ્રજેશ કુમારની સૂચનાથી PCBની ટીમ દ્વારા શહેરના પ્રવેશમાર્ગો પર વાહન ચેકિંગ અને પેટ્રોલિંગ કરવામાં આવી રહ્યું છે. PCBના PI એમ.આર. ગોંડલિયાની રાહબરી હેઠળ PSI પી.બી. ત્રાજિયા, આર.કે. જાડેજા સહિતનો સ્ટાફ આ કામગીરીમાં જોડાયો હતો.
દરમિયાન, ASI મહિપાલસિંહ ઝાલા, હેડ કોન્સ્ટેબલ હરદેવસિંહ રાણા અને કોન્સ્ટેબલ હરપાલસિંહ જાડેજાને બાતમી મળી હતી કે, આજી નદીના કાંઠે આવેલા ચુનારાવાડ વિસ્તારમાં રહેતો સુનિલ કિશન સોલંકી અને દૂધસાગર રોડ નજીક શિવાજીનગરમાં રહેતો સાગર ભરત મકવાણા સ્વીફ્ટ કારમાં વિદેશી દારૂનો જથ્થો લઈને પસાર થવાના છે.
બાતમીના આધારે પોલીસની ટીમે બેડી ચોકડીથી માલિયાસણ ગામ તરફ જતા માર્ગ પર વોચ ગોઠવી હતી. આ દરમિયાન શંકાસ્પદ સ્વીફ્ટ કાર આવતાં તેને અટકાવી તપાસ કરવામાં આવી હતી. કારની તલાશી લેતાં તેમાંથી વિદેશી દારૂની 528 બોટલ મળી આવી હતી. પોલીસે દારૂનો જથ્થો કબજે કરી કારમાં સવાર સુનિલ સોલંકી અને સાગર મકવાણાની ધરપકડ કરી હતી.
દારૂ ક્યાંથી લાવ્યા અને કોને આપવાનો હતો તે અંગે તપાસ
પોલીસે દારૂની બોટલો અને સ્વીફ્ટ કાર સહિત કુલ રૂ. 6.39 લાખનો મુદ્દામાલ કબજે કર્યો છે. પ્રાથમિક કાર્યવાહી બાદ હવે બંને આરોપીઓ દારૂનો જથ્થો ક્યાંથી લાવ્યા હતા, તેની પાછળ અન્ય કોઈ વ્યક્તિ સંડોવાયેલી છે કે કેમ અને આ જથ્થો કોને પહોંચાડવાનો હતો તે સહિતના મુદ્દે તપાસ હાથ ધરવામાં આવી છે. વધુ પૂછપરછ માટે બંને આરોપીઓના રિમાન્ડ મેળવવાની તજવીજ પણ શરૂ કરવામાં આવી છે.
