ફ્લાયદુબઈની ફ્લાઇટમાં સર્જાયેલી ગંભીર કટોકટી દરમિયાન મુસાફરોના જીવ બચાવનાર ભારતીય પાયલટ કેપ્ટન સ્મિત મચ્છરની બહાદુરીની ઇઝરાયેલમાં પણ પ્રશંસા થઈ રહી છે. ઇઝરાયેલના રાજદૂત રૂવેન અઝારે સ્મિતને ભારતના મહાન હીરો ગણાવી કહ્યું છે કે ઇઝરાયેલ તેમની બહાદુરીને ક્યારેય ભૂલશે નહીં અને તેમને દેશમાં વિશેષ સન્માન આપવામાં આવશે.
30 સપ્ટેમ્બરે દુબઈથી તેલ અવીવ જઈ રહેલી ફ્લાઇટ FZ1073માં કોકપિટમાં સહ-પાયલટ સાથે બનેલી ગંભીર ઘટનામાં કેપ્ટન સ્મિત મચ્છર ઘાયલ થયા હતા. અહેવાલો મુજબ, હુમલા દરમિયાન તેમણે કોકપિટનો દરવાજો ખોલ્યો, જેના કારણે મુસાફરો અને ક્રૂ મેમ્બર્સ અંદર પહોંચી શક્યા અને હુમલાખોરને કાબૂમાં લેવામાં આવ્યો. ત્યારબાદ બીજા પાયલટે વિમાનનું નિયંત્રણ સંભાળ્યું અને ફ્લાઇટને સુરક્ષિત રીતે સાઉદી અરેબિયાના તબૂક તરફ ડાઇવર્ટ કરવામાં આવી હતી.
ઘટનાના સમયે વિમાનમાં 174 મુસાફરો અને 8 ક્રૂ મેમ્બર્સ સવાર હોવાનું અહેવાલોમાં જણાવાયું છે. પરિવારજનોએ પણ જણાવ્યું છે કે ગંભીર રીતે ઘાયલ હોવા છતાં સ્મિતે કોકપિટની પરિસ્થિતિમાં ધૈર્ય જાળવી રાખ્યું હતું. ઘટનાની તપાસ દરમિયાન હુમલાખોરની પૂછપરછ, બ્લેક બોક્સના ડેટા અને મુસાફરો-ક્રૂના નિવેદનો જેવા પુરાવાઓનું વિશ્લેષણ કરવામાં આવી રહ્યું છે.
આ ઘટનાને લઈને ઇઝરાયેલમાં ખાસ કાર્યક્રમનું આયોજન કરવામાં આવ્યું હતું, જેમાં રાષ્ટ્રપતિ ઇસ્હાક હર્ઝોગ વર્ચ્યુઅલી જોડાયા હતા. તેલ અવીવમાં યોજાયેલા કાર્યક્રમ દરમિયાન કેપ્ટન સ્મિતની તસવીર સ્ટેજ પર મૂકવામાં આવી હતી અને ઉપસ્થિત લોકોએ તાળીઓ સાથે તેમની બહાદુરીને બિરદાવી હતી. ઇઝરાયેલના અધિકારીઓએ સ્મિત સંપૂર્ણ સ્વસ્થ થયા બાદ તેમને સત્તાવાર રીતે આમંત્રિત કરીને સન્માન કરવાની વાત પણ કરી છે.
દરમિયાન, ફેડરેશન ઓફ ઇન્ડિયન પાઇલટ્સ (FIP) દ્વારા કેપ્ટન સ્મિતને રાષ્ટ્રીય વીરતા પુરસ્કારથી સન્માનિત કરવા માટે પ્રધાનમંત્રી કાર્યાલયને પત્ર લખવામાં આવ્યો છે. રાજ્યસભા સાંસદ મિલિંદ દેવરાએ પણ સ્મિતને ‘અશોક ચક્ર’ આપવાની માંગ સાથે પ્રધાનમંત્રીને પત્ર લખ્યો હોવાનું જણાવાયું છે.
કેપ્ટન સ્મિતની બહાદુરીને લઈને ભારત અને ઇઝરાયેલ બંને તરફથી પ્રતિસાદ આવી રહ્યા છે. જોકે, ઘટનાનો ચોક્કસ હેતુ અને હુમલા પાછળનું કારણ તપાસ પૂર્ણ થયા બાદ જ સ્પષ્ટ થશે.
