આંતરરાષ્ટ્રીય બજારમાં ક્રૂડ ઓઇલના ભાવમાં વધારો અને ભારતીય બાસ્કેટનું બ્રેન્ટ ક્રૂડ એક તબક્કે 110 ડોલર સુધી પહોંચ્યા છતાં દેશમાં પેટ્રોલ-ડીઝલની માંગ વધી છે. સપ્ટેમ્બરમાં પેટ્રોલનું વેચાણ 7.21% વધીને 3.64 મિલિયન ટન, જ્યારે ડીઝલનું વેચાણ 4.26% વધીને 7.12 મિલિયન ટન નોંધાયું હતું.
બીજી તરફ સપ્ટેમ્બરમાં LPGનો વપરાશ 9.15% ઘટીને 2.64 મિલિયન ટન થયો હતો. પેટ્રોલ-ડીઝલના ભાવમાં વધારો ન થયો હોવા છતાં તેમની માંગ વધી છે, જ્યારે કોમર્શિયલ LPGના ભાવમાં વધારો થયો છે. સરકાર દ્વારા LPGના વિકલ્પ તરીકે પાઇપલાઇન મારફતે PNG ગેસનો ઉપયોગ વધારવા માટે ચલાવવામાં આવેલી ઝુંબેશની અસર પણ LPGના વપરાશમાં જોવા મળી રહી છે.
નબળા ચોમાસા અને ગરમીથી વીજ માંગમાં વધારો
નબળા ચોમાસા અને ગરમીના કારણે દેશમાં વીજળીની માંગમાં વધારો થયો છે. ગ્રીડ કંટ્રોલ ઓફ ઇન્ડિયાના આંકડા મુજબ સપ્ટેમ્બરમાં વીજ માંગ અને ઉત્પાદન વચ્ચેની ખાધ 544 મિલિયન યુનિટ થઈ હતી, જે ઓગસ્ટની સરખામણીએ લગભગ પાંચ ગણી વધારે છે.
વરસાદ ઓછો પડતાં કૃષિ ક્ષેત્રમાં વીજળીની માંગ વધી છે, જ્યારે ગરમીના કારણે પણ વીજ વપરાશમાં વધારો થયો છે. જોકે અનેક રાજ્યોમાં વીજળી સરપ્લસ હોવાથી રાષ્ટ્રીય સ્તરે વીજ ખાધ માત્ર 0.6% રહી છે. બીજી તરફ સોલાર વીજ ઉત્પાદન વધવાથી પણ દેશમાં વીજળીની મોટી તંગી ઊભી થઈ નથી.
