ઇન્ડોનેશિયાના ફ્લોરેસ આઇલેન્ડ નજીક 7.7ની તીવ્રતાનો શક્તિશાળી ભૂકંપ આવ્યો હતો. ભૂકંપના કારણે ઇમારતો અને મકાનો ધરાશાયી થતાં ઓછામાં ઓછા 20 લોકોનાં મોત અને 6 લોકો ઈજાગ્રસ્ત થયા છે. બે લોકો હજુ કાટમાળ નીચે ફસાયેલા હોવાની માહિતી છે.
USGS મુજબ ભૂકંપનું કેન્દ્ર ફ્લોરેસના ઉત્તર કિનારાથી આશરે 68 કિમી ઉત્તર-પશ્ચિમમાં અને 10 કિમી ઊંડાઈએ હતું. મુખ્ય આંચકા બાદ 5.9, 5.6 અને 6.1ની તીવ્રતાના આફ્ટરશોક્સ પણ નોંધાયા હતા.
ભૂકંપ બાદ ઇન્ડોનેશિયાના તંત્રએ સુનામીની ચેતવણી જાહેર કરી હતી, જેના પગલે હજારો લોકો ઊંચાણવાળા વિસ્તારો તરફ દોડી ગયા હતા. જોકે, દરિયાની સપાટીમાં નોંધપાત્ર વધારો ન થતાં થોડા કલાકોમાં ચેતવણી હટાવી દેવામાં આવી. કેટલાક વિસ્તારોમાં એક મીટરથી ઓછી ઊંચાઈના સુનામી મોજાં નોંધાયા હતા.
ભૂકંપના કારણે અનેક મકાનોને નુકસાન થયું છે, કેટલાક વિસ્તારોમાં ભૂસ્ખલન થયું છે અને વીજળી તથા સંચાર વ્યવસ્થાને પણ અસર પહોંચી છે. બચાવ કામગીરી ચાલુ છે અને ભૂકંપના કેન્દ્રની નજીકના વિસ્તારોમાં પહોંચવામાં મુશ્કેલી પડી રહી છે.
‘રિંગ ઓફ ફાયર’માં આવેલા ઇન્ડોનેશિયામાં 7.7ના ભૂકંપે ભારે તબાહી મચાવી છે, જ્યારે તંત્ર દ્વારા રાહત-બચાવ કામગીરી ઝડપી બનાવવામાં આવી રહી છે.
