સવારે 11.22થી બપોરે 12.35 વાગ્યા દરમિયાન મળ્યા ધમકીભર્યા ઈ-મેઇલ; બોમ્બ અને ડોગ સ્ક્વોડની તપાસમાં કંઈ શંકાસ્પદ મળ્યું નહીં
નવી દિલ્હી: દેશની રાજધાની દિલ્હીમાં શૈક્ષણિક સંસ્થાઓને બોમ્બથી ઉડાવી દેવાની ધમકીઓ મળવાનો સિલસિલો યથાવત છે. મંગળવારે ત્રણ શાળાઓ અને એક કોલેજને ધમકીભર્યા ઈ-મેઇલ મળતાં સુરક્ષા એજન્સીઓ દોડતી થઈ હતી. ઘટનાની જાણ થતાં જ પોલીસ અને બોમ્બ ડિસ્પોઝલ સ્ક્વોડે સંસ્થાઓમાં તપાસ હાથ ધરી હતી. જોકે, તપાસ દરમિયાન કોઈ વિસ્ફોટક કે શંકાસ્પદ વસ્તુ મળી આવી નહોતી.
બપોરે 11.22થી 12.35 વાગ્યા વચ્ચે ધમકીભર્યા ઈ-મેઇલ
દિલ્હી ફાયર સર્વિસના જણાવ્યા અનુસાર, પ્રથમ ધમકીભર્યો ઈ-મેઇલ સવારે 11.22 વાગ્યે મળ્યો હતો, જ્યારે છેલ્લો ઈ-મેઇલ બપોરે 12.35 વાગ્યે આવ્યો હતો. ધમકી મળતાં જ શાળા અને કોલેજના સંચાલકોએ પોલીસને જાણ કરી હતી. વિદ્યાર્થીઓ, શિક્ષકો અને કર્મચારીઓની સુરક્ષાને ધ્યાનમાં રાખીને સાવચેતીનાં પગલાં લેવામાં આવ્યાં હતાં.
બોમ્બ અને ડોગ સ્ક્વોડ દ્વારા સઘન તપાસ
દિલ્હી પોલીસની બોમ્બ ડિસ્પોઝલ સ્ક્વોડ અને સ્નિફર ડોગ ટીમોએ અસરગ્રસ્ત શાળાઓ તથા કોલેજના પરિસરની ઝીણવટભરી તપાસ કરી હતી. વર્ગખંડો, પ્રયોગશાળાઓ, હોલ અને અન્ય વિસ્તારોની તપાસ કરવામાં આવી હતી. જોકે, કોઈ શંકાસ્પદ વસ્તુ મળી ન આવતાં ધમકીઓ ખોટી હોવાનું સામે આવ્યું હતું.
ઈ-મેઇલ મોકલનારની શોધખોળ શરૂ
દિલ્હીની શૈક્ષણિક સંસ્થાઓને વારંવાર મળતી આવી ધમકીઓ પાછળ કોણ છે તે જાણવા પોલીસની સાઇબર ટીમ તપાસ કરી રહી છે. ઈ-મેઇલના ડિજિટલ પુરાવા, IP એડ્રેસ અને અન્ય ટેક્નિકલ વિગતોના આધારે મોકલનાર સુધી પહોંચવાનો પ્રયાસ કરવામાં આવી રહ્યો છે. વારંવાર આવી ધમકીઓ મળતાં શૈક્ષણિક સંસ્થાઓની સુરક્ષા વ્યવસ્થાને લઈને ચિંતા વધી છે.
