રોબિન ઉથપ્પા બેટિંગ કોચ, મિચેલ મેક્લેનાઘન બોલિંગ કોચ અને ટી દિલિપ ફીલ્ડિંગ કોચ તરીકે જોડાશે
મુંબઈ: ઇન્ડિયન પ્રીમિયર લીગ (IPL) 2027ની સીઝન પહેલાં પાંચ વખતની ચેમ્પિયન મુંબઈ ઈન્ડિયન્સે પોતાની નવી કોચિંગ ટીમની જાહેરાત કરી છે. ફ્રેન્ચાઈઝીએ વેસ્ટ ઈન્ડિઝના પૂર્વ ઓલરાઉન્ડર કાયરન પોલાર્ડને હેડ કોચની જવાબદારી સોંપી છે. આ ઉપરાંત ટીમના કોચિંગ સ્ટાફમાં રોબિન ઉથપ્પા, મિચેલ મેક્લેનાઘન, ટી દિલિપ અને ધવલ કુલકર્ણીનો સમાવેશ કરવામાં આવ્યો છે.
બેટિંગ અને બોલિંગ કોચ તરીકે જાણીતા ચહેરાઓ
નવી કોચિંગ ટીમમાં ભારતના પૂર્વ ક્રિકેટર રોબિન ઉથપ્પાને બેટિંગ કોચ બનાવવામાં આવ્યા છે, જ્યારે ન્યૂઝીલેન્ડના પૂર્વ ઝડપી બોલર મિચેલ મેક્લેનાઘન બોલિંગ કોચ તરીકે જવાબદારી સંભાળશે. ભારતીય ક્રિકેટ ટીમના પૂર્વ ફીલ્ડિંગ કોચ ટી દિલિપને મુંબઈ ઈન્ડિયન્સના ફીલ્ડિંગ કોચ તરીકે નિયુક્ત કરવામાં આવ્યા છે.
મુંબઈના પૂર્વ ઝડપી બોલર ધવલ કુલકર્ણીને ડેવલપમેન્ટ બોલિંગ કોચની જવાબદારી સોંપવામાં આવી છે. તેઓ યુવા બોલરોની પ્રતિભા અને કૌશલ્યને વિકસાવવા માટે કામ કરશે.
ત્રણેયનો મુંબઈ ઈન્ડિયન્સ સાથે જૂનો સંબંધ
આ કોચિંગ સેટઅપની ખાસિયત એ છે કે પોલાર્ડ, ઉથપ્પા અને મેક્લેનાઘન અગાઉ ખેલાડી તરીકે મુંબઈ ઈન્ડિયન્સ તરફથી રમી ચૂક્યા છે. તેથી તેઓ ટીમની કાર્યપદ્ધતિ અને સંસ્કૃતિથી સારી રીતે પરિચિત છે. પોલાર્ડ લાંબા સમય સુધી મુંબઈની ટીમનો હિસ્સો રહ્યા છે અને તેની અનેક ખિતાબી જીતમાં મહત્વની ભૂમિકા ભજવી ચૂક્યા છે.
હવે હેડ કોચ તરીકે તેમની સામે ખેલાડીઓ પાસેથી શ્રેષ્ઠ પ્રદર્શન મેળવવા અને ટીમને ફરી એકવાર IPL ચેમ્પિયન બનાવવાનો પડકાર રહેશે. નવી કોચિંગ ટીમના અનુભવ અને માર્ગદર્શનથી આગામી સીઝનમાં મુંબઈ ઈન્ડિયન્સ કેવું પ્રદર્શન કરે છે તેના પર ચાહકોની નજર રહેશે.
