દેશના એવિએશન ક્ષેત્રમાં માળખાકીય સુવિધાઓના વિસ્તરણ અને વિદેશી રોકાણને પ્રોત્સાહન આપવા કેન્દ્ર સરકાર વધુ 11 એરપોર્ટનું સંચાલન ખાનગી કંપનીઓને સોંપવાની તૈયારી કરી રહી છે. આ માટે ડિસેમ્બર સુધીમાં બિડિંગ પ્રક્રિયા શરૂ કરવાની અને નાણાકીય વર્ષ 2027ના અંત સુધીમાં સોદાઓને આખરી સ્વરૂપ આપવાની યોજના છે.
આગામી તબક્કામાં વારાણસી, અમૃતસર, રાયપુર, ભુવનેશ્વર અને તિરુચિરાપલ્લી સહિતના મહત્ત્વના એરપોર્ટનો સમાવેશ થાય છે. એરપોર્ટ્સ ઓથોરિટી ઓફ ઇન્ડિયા પ્રથમ વખત એરપોર્ટને પાંચ અલગ-અલગ ક્લસ્ટરમાં વહેંચીને 50 વર્ષના લીઝ પર આપવાની યોજના બનાવી રહી છે. તેમાં મોટા અને નફાકારક એરપોર્ટ સાથે નાના તથા પ્રાદેશિક એરપોર્ટને જોડવામાં આવશે.
આ યોજના હેઠળ વારાણસી સાથે ગયા અને કુશીનગર, અમૃતસર સાથે કાંગડા, ભુવનેશ્વર સાથે હુબલી, રાયપુર સાથે ઔરંગાબાદ અને તિરુચિરાપલ્લી સાથે તિરુપતિ એરપોર્ટને જોડવાનું આયોજન છે. આ વ્યવસ્થાનો હેતુ નાના શહેરો અને તીર્થસ્થળો સાથે જોડાયેલા એરપોર્ટનો પણ સમાન વિકાસ સુનિશ્ચિત કરવાનો છે.
એરપોર્ટ ક્ષેત્રમાં એક જ કંપનીનું વર્ચસ્વ ન વધે તે માટે સરકાર બિડિંગના નિયમોમાં પણ ફેરફાર કરવાની તૈયારીમાં છે. એક કંપની મહત્તમ કેટલા એરપોર્ટ અથવા ક્લસ્ટર માટે બોલી લગાવી શકે તેની મર્યાદા નક્કી કરવામાં આવશે. આ પગલાથી ખાનગી ઓપરેટરો વચ્ચે સ્વસ્થ સ્પર્ધા વધવાની અને દેશના હવાઈ પરિવહન ક્ષેત્રમાં રોકાણને વેગ મળવાની અપેક્ષા છે.
