બે અન્ય સરકારી બેન્કોના ખાનગીકરણની પણ શક્યતા, સરકારની નવી રણનીતિથી બેન્કિંગ ક્ષેત્રમાં ચર્ચા
કેન્દ્ર સરકાર જાહેર ક્ષેત્રની બેન્કોમાં પોતાની ભાગીદારી ઘટાડવા માટે નવી રણનીતિ તૈયાર કરી રહી છે. અહેવાલો મુજબ, IDBI બેન્કના સોદા બાદ હવે સેન્ટ્રલ બેન્ક ઓફ ઇન્ડિયા, યુકો બેન્ક, પંજાબ એન્ડ સિંધ બેન્ક અને ઇન્ડિયન ઓવરસીઝ બેન્કમાં સરકારી હિસ્સો ઘટાડીને 75% કરવાની વિચારણા ચાલી રહી છે.
આ પગલાનો મુખ્ય હેતુ શેરબજારના લઘુત્તમ જાહેર હિસ્સેદારી (MPS) સંબંધિત નિયમોનું પાલન કરવાનો છે. આ માટે સરકાર બજારની સ્થિતિને ધ્યાનમાં રાખીને ઓફર ફોર સેલ (OFS) મારફતે શેર વેચી શકે છે. જોકે, આ ચારેય બેન્કોનું સંપૂર્ણ ખાનગીકરણ કરવાનો કોઈ નિર્ણય લેવાયો હોવાની પુષ્ટિ નથી.
બીજી તરફ, સરકાર બેન્કિંગ ક્ષેત્રમાં એકત્રીકરણની શક્યતાઓ પણ તપાસી રહી છે. આગામી તબક્કામાં અન્ય બે સરકારી બેન્કોને ખાનગીકરણ માટે સંભવિત ઉમેદવાર તરીકે વિચારવામાં આવી શકે છે. જોકે, આ અંગે હજુ અંતિમ નિર્ણય લેવાયો નથી. સરકારની નવી નીતિથી જાહેર ક્ષેત્રની બેન્કોમાં માલિકીનું માળખું બદલાવાની શક્યતા છે.
