1,068 બોટલ અને બિયરના ટીન સહિત રૂ. 6.06 લાખનો મુદ્દામાલ કબજે, કારચાલકની ધરપકડ
જામનગર જિલ્લાના ધ્રોલમાં હરધ્રોલ હાઈસ્કૂલ સામે પોલીસે વોચ ગોઠવી ઇનોવા કારમાંથી વિદેશી દારૂની 1,068 નાની-મોટી બોટલો અને બિયરના ટીન સહિત રૂ. 2.51 લાખનો જથ્થો ઝડપી પાડ્યો હતો. પોલીસે કાર, મોબાઇલ ફોન અને દારૂ-બિયર સહિત કુલ રૂ. 6.06 લાખનો મુદ્દામાલ કબજે કર્યો હતો.
જામનગર ગ્રામ્ય વિભાગના ડીવાયએસપી પિયુષ વાંદાના માર્ગદર્શન હેઠળ ધ્રોલ પોલીસ પેટ્રોલિંગમાં હતી. દરમિયાન મળેલી બાતમીના આધારે જીજે-10-વાય-9410 નંબરની ઇનોવા કાર અટકાવી તપાસ કરવામાં આવી હતી. કારમાંથી દારૂ-બિયરનો જથ્થો મળી આવતાં પોલીસે ચાલક પ્રેમભારથી ભીખુભારથી ગોસાઈ (ઉ.વ. 30, રહે. જામનગર)ની ધરપકડ કરી હતી.
આ કેસમાં દારૂનો જથ્થો મંગાવનાર જામનગરના જીતેન્દ્રભાઈ મનસુખભાઈ વિઠલાણી અને જથ્થો પૂરો પાડનાર સુરેન્દ્રનગર જિલ્લાના ઝીંઝુવાડાના જનકસિંહ કિરીટસિંહ ઝાલાને ફરાર દર્શાવી પોલીસે વધુ તપાસ હાથ ધરી છે.
