તિરુપતિ બાલાજી મંદિરના લાડુ પ્રસાદમાં વપરાતા ઘીની ગુણવત્તાને લઈને ફરી વિવાદ ઊભો થયો છે. પ્રવર્તન નિદેશાલય (ED)ના જણાવ્યા અનુસાર, વર્ષ 2019થી 2024 દરમિયાન તિરુમાલા તિરુપતિ દેવસ્થાનમ (TTD)ને કથિત રીતે ભેળસેળયુક્ત ઘી સપ્લાય કરવામાં આવ્યું હતું. તપાસ એજન્સીનો દાવો છે કે ઘીમાં અસલી દૂધની મલાઈના ઘીના બદલે રિફાઇન્ડ પામ ઓઈલ, પામ કર્નલ ઓઈલ અને પામોલિન જેવા વનસ્પતિ તેલનો ઉપયોગ કરવામાં આવ્યો હતો.
EDના દાવા મુજબ, આ મિશ્રણને ઘી જેવું બનાવવા માટે એમજી-90, મોનોગ્લિસરાઈડ્સ, માયવેસિટ સોફ્ટ 400 અને એસિટિક એસિડ એસ્ટર જેવા રસાયણોનો ઉપયોગ કરવામાં આવ્યો હોવાની માહિતી સામે આવી છે. તપાસમાં આ સમયગાળા દરમિયાન આશરે રૂ.230 કરોડના શંકાસ્પદ ઘીના સપ્લાયની વિગતો સામે આવી હોવાનું એજન્સીએ જણાવ્યું છે.
આ કેસમાં સુકૃતિ ફૂડ્સ પ્રાઈવેટ લિમિટેડના પ્રમોટર કૈલાશ ચંદ મંગલાની ધરપકડ કરવામાં આવી છે. EDના જણાવ્યા અનુસાર, તેમની કંપની દ્વારા આ સમયગાળા દરમિયાન આશરે રૂ.96 કરોડનું કથિત ભેળસેળયુક્ત ઘી સપ્લાય કરવામાં આવ્યું હતું.
તિરુપતિ મંદિરનો લાડુ પ્રસાદ કરોડો ભક્તોની આસ્થા સાથે જોડાયેલો હોવાથી ઘીની ગુણવત્તા અંગેના આ આરોપો બાદ અનેક સવાલો ઊભા થયા છે. ખાસ કરીને લાંબા સમય સુધી કથિત રીતે આવી સામગ્રીનો સપ્લાય કેવી રીતે થતો રહ્યો અને ગુણવત્તા ચકાસણીની વ્યવસ્થામાં ક્યાં ખામી રહી તે અંગે તપાસ ચાલી રહી છે.
જોકે, ઘીમાં ભેળસેળ તથા સપ્લાય અંગેના આ તમામ આરોપો ED દ્વારા કરવામાં આવેલા દાવા છે અને તેની અંતિમ સત્યતા અદાલતી કાર્યવાહી દરમિયાન નક્કી થવાની બાકી છે.
