ન્યૂયોર્કમાં રહેતા બાળકે ‘ડીનો લર્ન્સ નોટ ટુ વેસ્ટ ફૂડ’ પુસ્તક દ્વારા આપ્યો ખોરાકનો બગાડ અટકાવવાનો સંદેશ, નાની ઉંમરે મેળવી અનોખી સિદ્ધિ
અમેરિકાના ન્યૂયોર્કમાં રહેતા ભારતીય મૂળના અદ્વય જૈને નાની ઉંમરે અનોખી સિદ્ધિ હાંસલ કરીને સૌનું ધ્યાન ખેંચ્યું છે. માત્ર 3 વર્ષ અને 345 દિવસની ઉંમરે પુસ્તક પ્રકાશિત કરીને તેણે ગિનિસ વર્લ્ડ રેકોર્ડ્સમાં પોતાનું નામ નોંધાવ્યું છે. ચાર વર્ષનો થાય તે પહેલાં જ પુસ્તક લખનાર અદ્વયે બાળકોને ખોરાકનો બગાડ અટકાવવા અને સ્વસ્થ આહાર અપનાવવાનો પ્રેરણાદાયી સંદેશ આપ્યો છે.
બહેન પાસેથી મળી લેખનની પ્રેરણા
અદ્વયનો જન્મ 23 એપ્રિલ, 2022ના રોજ થયો હતો, જ્યારે તેનું પુસ્તક 3 એપ્રિલ, 2026ના રોજ પ્રકાશિત થયું હતું. તેની 12 વર્ષની મોટી બહેન લેખન અને ચિત્રકામના ક્ષેત્રમાં સક્રિય છે. બહેનની સર્જનાત્મક પ્રવૃત્તિઓથી પ્રેરાઈને અદ્વયે પણ લખાણ તરફ રસ કેળવ્યો હતો.
શાળામાં બાળકોની ખાવાની ટેવ જોઈ આવ્યો વિચાર
અદ્વયે પોતાના પુસ્તકનું નામ ‘ડીનો લર્ન્સ નોટ ટુ વેસ્ટ ફૂડ’ રાખ્યું છે. શાળામાં લંચ બ્રેક દરમિયાન સહપાઠીઓની ખોરાક પ્રત્યેની ટેવોનું નિરીક્ષણ કરતાં તેને ખોરાકનો બગાડ અટકાવવા અંગે પુસ્તક લખવાનો વિચાર આવ્યો હતો.
આ પુસ્તકમાં બાળકોને ખોરાકની કિંમત સમજવા, ભોજનનો બગાડ ન કરવા અને પૌષ્ટિક તથા સ્વસ્થ આહાર લેવાની પ્રેરણા આપવામાં આવી છે. સરળ અને બાળમિત્ર અભિગમ દ્વારા અદ્વયે પોતાની જ ઉંમરનાં બાળકો સુધી મહત્ત્વપૂર્ણ સંદેશ પહોંચાડવાનો પ્રયાસ કર્યો છે.
નાની ઉંમરે મોટી પ્રેરણા
અદ્વયની આ સિદ્ધિ દર્શાવે છે કે સારા વિચારોને વ્યક્ત કરવા માટે ઉંમર કોઈ મર્યાદા નથી. બાળવયમાં જ ખોરાકના બગાડ જેવા સામાજિક મુદ્દા અંગે જાગૃતિ ફેલાવવાનો તેનો પ્રયાસ પ્રશંસનીય છે. પોતાની સર્જનાત્મકતાના બળે અદ્વયે નાની ઉંમરે અનોખી ઓળખ ઊભી કરી છે અને અન્ય બાળકોને પણ કંઈક નવું સર્જવાની પ્રેરણા આપી છે.
