બિહારના પટણામાં SIR પ્રક્રિયાના વિરોધમાં AISA દ્વારા લોકભવન તરફ માર્ચ યોજવામાં આવી હતી. દેખાવકારોએ મુખ્ય ચૂંટણી કમિશનર જ્ઞાનેશ કુમારના રાજીનામા અને મતદાર યાદીમાંથી નામ હટાવવાની પ્રક્રિયા રદ કરવાની માંગ સાથે કેન્દ્ર સરકાર તથા ચૂંટણી પંચ વિરુદ્ધ સૂત્રોચ્ચાર કર્યા હતા.
ગાંધી મેદાન નજીક પોલીસે બેરિકેડિંગ કરીને માર્ચ રોકવાનો પ્રયાસ કર્યો હતો. આ દરમિયાન કેટલાક દેખાવકારોએ બેરિકેડ તોડીને આગળ વધવાનો પ્રયાસ કરતાં પોલીસે અનેક કાર્યકરોને કસ્ટડીમાં લીધા હતા. AISAએ આરોપ લગાવ્યો હતો કે SIR પ્રક્રિયા દરમિયાન મોટી સંખ્યામાં જીવિત મતદારોનાં નામ યાદીમાંથી દૂર કરવામાં આવી રહ્યાં છે. સંગઠને સમગ્ર પ્રક્રિયા રદ કરી કથિત અનિયમિતતાઓ અંગે ચૂંટણી પંચની જવાબદારી નક્કી કરવાની માંગ કરી હતી. વિરોધ પ્રદર્શનને પગલે ઘટનાસ્થળે તંગદિલીનો માહોલ સર્જાયો હતો.
