હોર્મુઝ વિસ્તારમાં દરિયાઈ તણાવ વચ્ચે ભારતીય ખલાસીઓ ધરાવતા વધુ એક વ્યાપારી જહાજ પર ડ્રોન હુમલો થયાની ઘટના સામે આવી છે. અહેવાલ મુજબ, 11 ભારતીય ક્રૂ મેમ્બર સાથે જઈ રહેલા ‘એમ.ટી. પેટ્રો ડોલ્ફીન’ જહાજ પર 11 ઓક્ટોબરના રોજ હુમલો કરવામાં આવ્યો હતો. હુમલા બાદ જહાજમાં આગ લાગતાં અફરાતફરી મચી ગઈ હતી. આ ઘટનામાં નવ ખલાસીઓને સુરક્ષિત બચાવી લેવામાં આવ્યા છે, જ્યારે બે ભારતીય ખલાસીઓ લાપતા હોવાનું જણાવાયું છે.
હુમલા બાદ લાપતા થયેલા બંને ખલાસીઓની શોધખોળ માટે કામગીરી હાથ ધરવામાં આવી છે. જહાજ પર આગ લાગવાના કારણે બચાવ કામગીરી પણ પડકારજનક બની હતી. આ ઘટનાને પગલે હોર્મુઝ વિસ્તારમાં ભારતીય ખલાસીઓની સુરક્ષાને લઈને ચિંતા વધી છે.
આ પહેલાં હોર્મુઝ વિસ્તારમાં ‘એમ.ટી. વાલ્થુરા’ નામના અન્ય એક જહાજ પર પણ હુમલો થયો હોવાના અહેવાલ છે. માર્શલ ટાપુના ધ્વજ હેઠળ નોંધાયેલા આ જહાજમાં પણ આગ લાગી હતી, પરંતુ તેના પર સવાર તમામ 11 ભારતીય ખલાસીઓને સુરક્ષિત બચાવી લેવામાં આવ્યા હોવાનું જણાવાયું છે.
હોર્મુઝ વિસ્તાર આંતરરાષ્ટ્રીય દરિયાઈ વેપાર માટે અત્યંત મહત્ત્વનો હોવાથી અહીં ભારતીય ક્રૂ મેમ્બર ધરાવતા અનેક વ્યાપારી જહાજોની અવરજવર રહે છે. વિશ્વભરના વ્યાપારી જહાજોમાં મોટી સંખ્યામાં ભારતીય ખલાસીઓ ફરજ બજાવતા હોવાથી આવી ઘટનાઓ ભારત માટે ચિંતાનો વિષય બની છે. લાપતા ખલાસીઓની શોધ અને ભારતીય નાગરિકોની સુરક્ષા પર હાલ વિશેષ ધ્યાન કેન્દ્રિત કરવામાં આવી રહ્યું છે.
