144 બોટલ દારૂ અને મોબાઇલ સહિત રૂ. 1.25 લાખનો મુદ્દામાલ જપ્ત; એક આરોપી સામે અગાઉ પણ બે પ્રોહિબિશનના ગુના નોંધાયા
રાજકોટ: રાજકોટ ગ્રામ્ય પોલીસ દ્વારા દારૂની ગેરકાયદેસર હેરાફેરી અને વેચાણ સામે કાર્યવાહી હાથ ધરવામાં આવી છે. રાજકોટ SP વિજયસિંહ ગુર્જરના માર્ગદર્શન હેઠળ રૂરલ LCBની ટીમે શાપર-વેરાવળ ગામમાં આવેલા દાસારામ ઓટો ગેરેજમાં દરોડો પાડીને વિદેશી દારૂના જથ્થા સાથે બે શખ્સોને ઝડપી પાડ્યા હતા.
પોલીસને બાતમી મળી હતી કે શાપર ગામના ટીલાળા ગેટની અંદર આવેલા ગેરેજમાં વિદેશી દારૂનો જથ્થો રાખીને તેનું વેચાણ કરવામાં આવે છે. આ માહિતીના આધારે LCBની ટીમે સ્થળ પર દરોડો પાડ્યો હતો. કાર્યવાહી દરમિયાન મનીષ બળવંત સોદરવા (26) અને ભાર્ગવ રાજા પીપરોતર (21)ને ઝડપી લેવામાં આવ્યા હતા.
દરોડા દરમિયાન પોલીસને વિદેશી દારૂની કુલ 144 બોટલો મળી આવી હતી, જેની કિંમત રૂ. 60,144 હોવાનું જણાવાયું છે. આ ઉપરાંત મોબાઇલ ફોન સહિત કુલ રૂ. 1.25 લાખનો મુદ્દામાલ કબજે કરવામાં આવ્યો હતો. પોલીસ તપાસમાં મનીષ સોદરવા સામે અગાઉ શાપર પોલીસ સ્ટેશનમાં પ્રોહિબિશનના બે અલગ-અલગ ગુના નોંધાયેલા હોવાનું પણ સામે આવ્યું છે.
રૂરલ LCBના PI જે.પી. રાવના માર્ગદર્શન હેઠળ PSI એચ.સી. ગોહિલ સહિતના પોલીસ સ્ટાફે આ કાર્યવાહી હાથ ધરી હતી. પોલીસે બંને આરોપીઓ સામે કાયદેસરની કાર્યવાહી કરી દારૂના જથ્થા અંગે વધુ તપાસ શરૂ કરી છે.
