લાસ કોન્ડેસ વિસ્તારમાં કટોકટી જાહેર; રસ્તાઓ પર પાણી અને કાદવ ફરી વળ્યાં, બચાવ કામગીરી શરૂ
ચિલીની રાજધાની સાંતિયાગો અને આસપાસના વિસ્તારોમાં અતિભારે વરસાદને કારણે પૂર જેવી સ્થિતિ સર્જાઈ છે. અચાનક ધસી આવેલા પાણી અને કાદવના પ્રવાહે રસ્તાઓને નદીમાં ફેરવી દીધા હતા. અનેક કારો પાણીના પ્રવાહમાં તણાઈને એકબીજા સાથે અથડાઈ હતી. આ કુદરતી આફતમાં ઓછામાં ઓછા છ લોકો ઈજાગ્રસ્ત થયા હોવાના અહેવાલ છે.
પરિસ્થિતિની ગંભીરતાને ધ્યાનમાં રાખીને સાંતિયાગોના લાસ કોન્ડેસ વિસ્તારમાં કટોકટી જાહેર કરવામાં આવી છે. ટૂંકા સમયમાં પડેલા ભારે વરસાદને કારણે ડ્રેનેજ વ્યવસ્થા ખોરવાઈ જતાં રસ્તાઓ પર પાણી અને કાદવ ફરી વળ્યાં હતાં. સોશિયલ મીડિયા પર સામે આવેલા સીસીટીવી દૃશ્યોમાં એક વ્યક્તિ ટ્રકની છત પર બેઠેલી જોવા મળે છે, જ્યારે પૂરનો પ્રવાહ ટ્રકને પણ તાણી જતો દેખાય છે.
બચાવ કામગીરી તેજ, અસરગ્રસ્ત વિસ્તારો ખાલી કરાવાયા
પૂરની સ્થિતિને પહોંચી વળવા સ્થાનિક પ્રશાસન દ્વારા રાહત અને બચાવ કામગીરી શરૂ કરવામાં આવી છે. મપોચો નદીના પાણી કાંઠા વટાવીને બહાર આવતાં આસપાસના વિસ્તારોમાં જોખમ વધ્યું હતું. સુરક્ષાને ધ્યાનમાં રાખીને કેટલાક વિસ્તારો ખાલી કરાવવાના આદેશો આપવામાં આવ્યા છે અને શાળાઓ બંધ રાખવામાં આવી છે. સેનાના જવાનો પણ રસ્તાઓ પરથી કાદવ અને કાટમાળ દૂર કરવાની કામગીરીમાં જોડાયા છે.
ભારે વરસાદને કારણે વાહનવ્યવહાર અને સામાન્ય જનજીવન પર વ્યાપક અસર પડી છે. પ્રશાસન દ્વારા લોકોને સાવચેતી રાખવા અને પૂરગ્રસ્ત વિસ્તારોમાં અવરજવર ટાળવા સૂચના આપવામાં આવી છે.
