પશ્ચિમ બંગાળના જાણીતા અભિનેતા અને ભાજપ નેતા મિથુન ચક્રવર્તીને રાજ્ય સરકારમાં મહત્વની જવાબદારી સોંપવામાં આવી છે. પશ્ચિમ બંગાળ સરકારે તેમને માહિતી અને સાંસ્કૃતિક બાબતોના વિભાગમાં સાંસ્કૃતિક સલાહકાર તરીકે નિયુક્ત કર્યા છે. આ સાથે તેમને કેબિનેટ મંત્રીનો દરજ્જો પણ આપવામાં આવ્યો છે.
સરકારી જાહેરનામા મુજબ તેમની નિમણૂક તાત્કાલિક અસરથી અમલમાં આવી છે અને આગામી આદેશ સુધી ચાલુ રહેશે. જોકે, મિથુન ચક્રવર્તી કેબિનેટ મંત્રી તરીકે નહીં, પરંતુ કેબિનેટ મંત્રીના દરજ્જા સાથે સાંસ્કૃતિક સલાહકાર તરીકે પોતાની જવાબદારી નિભાવશે.
સંસ્કૃતિ અને કલા ક્ષેત્રે માર્ગદર્શન આપશે
નવી જવાબદારી હેઠળ મિથુન ચક્રવર્તી રાજ્યના માહિતી અને સાંસ્કૃતિક બાબતોના વિભાગને સંસ્કૃતિ, કલા અને માહિતી સંબંધિત વિવિધ મુદ્દાઓ પર માર્ગદર્શન અને સલાહ આપશે. તેમની ચોક્કસ જવાબદારીઓનો વ્યાપ આગામી તબક્કામાં વધુ સ્પષ્ટ કરવામાં આવે તેવી શક્યતા છે.
મિથુન ચક્રવર્તીને સાંસ્કૃતિક સલાહકાર બનાવવાની જાહેરાત અગાઉ ઉત્તમ કુમાર ફિલ્મ સેન્ટરના શિલાન્યાસ કાર્યક્રમ દરમિયાન કરવામાં આવી હતી. ફિલ્મ ક્ષેત્રે તેમના લાંબા સમયના યોગદાન અને પશ્ચિમ બંગાળ સાથેના તેમના ગાઢ સંબંધોને ધ્યાનમાં રાખીને તેમને આ મહત્વપૂર્ણ જવાબદારી સોંપવામાં આવી હોવાનું માનવામાં આવે છે.
