ભારતમાં ઉગ્રવાદી જૂથો દ્વારા સ્ટારલિંકનો ઉપયોગ કરવામાં આવી રહ્યો હોવાના દાવાને સ્પેસએક્સના પ્રમુખ એલન મસ્કે ફગાવી દીધો છે. મસ્કે જણાવ્યું કે હાલમાં ભારત ઉપર સ્ટારલિંકના સિગ્નલ સક્રિય નથી. આથી ભારતમાં સ્ટારલિંક સેવાનો ઉપયોગ થયો હોવાના દાવા પર તેમણે સવાલ ઉઠાવ્યો છે.
મ્યાનમાર સરહદ નજીક ડિવાઇસ મળ્યાનો દાવો
તાજેતરમાં સોશિયલ મીડિયા પર દાવો કરવામાં આવ્યો હતો કે સુરક્ષા દળોને મ્યાનમાર સરહદ નજીક મણિપુરમાં સક્રિય ઉગ્રવાદી જૂથો પાસેથી સ્ટારલિંકનાં ઉપકરણો મળ્યાં છે. જોકે, આ દાવા બાદ સોશિયલ મીડિયા પર જ પ્રશ્નો ઉઠ્યા હતા કે ભારતમાં સ્ટારલિંકના સિગ્નલ સક્રિય ન હોય તો આ ઉપકરણો દ્વારા ઈન્ટરનેટ કનેક્શન કેવી રીતે શક્ય બને?
આ સવાલ પર એલન મસ્કે પ્રતિક્રિયા આપતા ભારતમાં સ્ટારલિંકના ઉપયોગ અંગેના દાવાઓને નકારી કાઢ્યા હતા.
ભારતમાં સેવા શરૂ કરવા સ્ટારલિંકની તૈયારી
સ્ટારલિંક ભારતમાં પોતાની વ્યાપારી સેવા શરૂ કરવાની તૈયારીમાં છે. ઇન્ડિયા મોબાઈલ કોંગ્રેસ દરમિયાન કંપનીના બિઝનેસ ઓપરેશન્સના વાઇસ પ્રેસિડેન્ટ લોરેન ડ્રેયરે જણાવ્યું હતું કે ભારતીય સુરક્ષા જરૂરિયાતો અને નિયમોને અનુરૂપ વ્યવસ્થા કરવામાં આવી છે.
કંપનીએ ભારતમાં 20 પ્રવેશ કેન્દ્રો સ્થાપ્યા હોવાનું અને સેંકડો એન્ટેના લગાવ્યા હોવાનું જણાવાયું છે. ભારતીય ગ્રાહકોનો ડેટા ભારતમાં જ સુરક્ષિત રહે તે માટે પણ વ્યવસ્થા કરવામાં આવી છે. કંપની છેલ્લા પાંચ વર્ષથી ભારતીય નિયમનકારો અને ટેલિકોમ ઉદ્યોગ સાથે મળીને કામ કરી રહી છે.
અંતરિયાળ વિસ્તારોમાં હાઈ-સ્પીડ ઈન્ટરનેટની આશા
સ્ટારલિંક એવા વિસ્તારોમાં હાઈ-સ્પીડ ઈન્ટરનેટ સેવા પહોંચાડવામાં મદદરૂપ બની શકે છે, જ્યાં કેબલ અથવા મોબાઈલ નેટવર્ક પહોંચાડવું મુશ્કેલ છે. ખાસ કરીને અંતરિયાળ વિસ્તારોની શાળાઓમાં ઓનલાઈન શિક્ષણ અને હોસ્પિટલોમાં ટેલીમેડિસિન માટે તેનો ઉપયોગ થઈ શકે છે.
કુદરતી આપત્તિ દરમિયાન જ્યારે પરંપરાગત સંચાર વ્યવસ્થા ખોરવાઈ જાય ત્યારે પણ સેટેલાઇટ આધારિત સ્ટારલિંક વૈકલ્પિક સંચાર માધ્યમ તરીકે ઉપયોગી બની શકે છે.
