કાબુલ: અફઘાનિસ્તાન અને પાકિસ્તાન વચ્ચે સરહદ પર ચાલી રહેલો તણાવ વધુ ગંભીર બન્યો છે. ગુરુવારે પાકિસ્તાની સૈન્ય દ્વારા અફઘાનિસ્તાનના હેલમંદ પ્રાંતમાં હવાઈ હુમલો કરવામાં આવ્યો હોવાના અહેવાલ છે. સ્થાનિક અધિકારીઓના જણાવ્યા અનુસાર આ હુમલામાં 22 લોકોનાં મોત થયા છે, જ્યારે 11થી વધુ લોકો ઘાયલ થયા છે.
હેલમંદના માહિતી અને સંસ્કૃતિ વિભાગના વડા મૌલાના શેર મોહમ્મદ વહદતે જણાવ્યું હતું કે પાકિસ્તાની સૈન્ય દ્વારા ગરમસિર જિલ્લામાં આવેલા બે રહેણાંક મકાનોને નિશાન બનાવીને હવાઈ હુમલો કરવામાં આવ્યો હતો. હુમલા બાદ બંને મકાનોને ભારે નુકસાન થયું હોવાનું જણાવાયું છે.
સ્થાનિક અધિકારીઓના જણાવ્યા અનુસાર હુમલામાં મૃત્યુ પામેલા અને ઘાયલ થયેલા લોકોમાં મહિલાઓ અને બાળકોનો પણ સમાવેશ થાય છે. હુમલા બાદ વિસ્તારમાં અફરાતફરીનો માહોલ સર્જાયો છે અને સરહદી વિસ્તારોમાં સુરક્ષા સ્થિતિ વધુ તંગ બની છે.
બીજી તરફ, પાકિસ્તાની સત્તાવાળાઓએ હુમલાની પુષ્ટિ કરી હોવાનું જણાવાયું છે અને માર્યા ગયેલા લોકોને આતંકવાદી ગણાવ્યા છે. જોકે, અફઘાન અધિકારીઓ દ્વારા રહેણાંક વિસ્તારોને નિશાન બનાવવામાં આવ્યા હોવાના આક્ષેપ કરવામાં આવ્યા છે.
અફઘાનિસ્તાન અને પાકિસ્તાન વચ્ચે છેલ્લા કેટલાક સમયથી સરહદ અને સુરક્ષા મુદ્દે તણાવ ચાલી રહ્યો છે. તાજેતરના હવાઈ હુમલા બાદ બંને દેશો વચ્ચેના સંબંધોમાં વધુ તણાવ વધવાની શક્યતા છે.
