કેન્દ્રીય કેબિનેટની ₹1.86 લાખ કરોડની PM-DHARA યોજનાને મંજૂરી: 50 GWh બેટરી સ્ટોરેજ પણ બનશે
નવી દિલ્હી: વડાપ્રધાન નરેન્દ્ર મોદીની અધ્યક્ષતામાં મળેલી કેન્દ્રીય કેબિનેટની બેઠકમાં દેશના રિન્યુએબલ એનર્જી ક્ષેત્રને મજબૂત બનાવવા માટે ₹1,86,405 કરોડની PM-DHARA યોજનાને મંજૂરી આપવામાં આવી છે. આ યોજના હેઠળ રાજ્યો અને કેન્દ્રશાસિત પ્રદેશોમાં ઇન્ટ્રા-સ્ટેટ ટ્રાન્સમિશન સિસ્ટમને મજબૂત કરવામાં આવશે, જેથી 135 ગીગાવોટ સુધીની રિન્યુએબલ એનર્જીનું ટ્રાન્સમિશન સરળ બની શકે.
PM-DHARAનું સંપૂર્ણ નામ PM-Developing Harmonized and Accelerated Renewable-energy Access છે. આ યોજના ગ્રીન એનર્જી કોરિડોરના ત્રીજા તબક્કા સાથે જોડાયેલી છે અને તેનો અમલ નાણાકીય વર્ષ 2032-33 સુધીમાં કરવાનો લક્ષ્યાંક છે.
50 GWh બેટરી સ્ટોરેજની જોગવાઈ
યોજનામાં 50 GWh ક્ષમતાવાળી Battery Energy Storage Systems (BESS) સ્થાપવાની પણ જોગવાઈ કરવામાં આવી છે. આ સ્ટોરેજ સિસ્ટમ રિન્યુએબલ એનર્જીના ઉત્પાદન અને વીજળીની માંગ વચ્ચે સંતુલન જાળવવામાં મદદ કરશે.
સોલાર અને પવન ઊર્જાનું ઉત્પાદન હવામાન અને સમય પ્રમાણે બદલાતું હોવાથી વીજળીની સપ્લાયમાં વધઘટ થતી રહે છે. બેટરી સ્ટોરેજથી આ અનિશ્ચિતતા, ટ્રાન્સમિશન કન્જેશન અને પીક અવર્સ દરમિયાન વીજળીમાં ઘટાડા જેવી સમસ્યાઓને પહોંચી વળવામાં મદદ મળશે. રાત્રિના સમયે પણ સંગ્રહિત વીજળીનો ઉપયોગ કરી શકાશે.
ટ્રાન્સમિશન ચાર્જ ઘટાડવામાં મદદ
યોજનાના કુલ ખર્ચમાંથી ₹1,36,378 કરોડ ઇન્ટ્રા-સ્ટેટ ટ્રાન્સમિશન સિસ્ટમ માટે અને ₹50,000 કરોડ 50 GWh બેટરી સ્ટોરેજ માટે ફાળવવામાં આવ્યા છે. કેન્દ્ર સરકાર તરફથી કુલ ₹54,082 કરોડની નાણાકીય સહાય આપવામાં આવશે.
કેન્દ્રીય નાણાકીય સહાયનો એક હેતુ રાજ્યો પરના ઇન્ટ્રા-સ્ટેટ ટ્રાન્સમિશન ચાર્જના ભારને ઘટાડવાનો છે. આથી રિન્યુએબલ વીજળીના ટ્રાન્સમિશન માટે જરૂરી માળખું વિકસાવવામાં મદદ મળશે.
રોજગારીની નવી તકો ઊભી થશે
PM-DHARA યોજના હેઠળ ટ્રાન્સમિશન નેટવર્ક, બેટરી સ્ટોરેજ અને અન્ય પાવર ઈન્ફ્રાસ્ટ્રક્ચરના વિકાસથી પાવર, મેન્યુફેક્ચરિંગ અને કન્સ્ટ્રક્શન ક્ષેત્રોમાં સીધી અને પરોક્ષ રોજગારીની તકો ઊભી થવાની અપેક્ષા છે.
બેટરી એનર્જી સ્ટોરેજ સિસ્ટમના ઉત્પાદન અને સ્થાપનથી ઘરેલુ એનર્જી સ્ટોરેજ ક્ષેત્રને પણ વેગ મળી શકે છે. ઉપરાંત, ઓપરેશન, મેન્ટેનન્સ અને ગ્રિડ મેનેજમેન્ટમાં લાંબા ગાળાની કુશળ રોજગારીની તકો ઊભી થશે.
2030ના રિન્યુએબલ એનર્જી લક્ષ્યને વેગ
ભારતે 2030 સુધીમાં 500 GW રિન્યુએબલ એનર્જી ક્ષમતા હાંસલ કરવાનો લક્ષ્યાંક નક્કી કર્યો છે. આ વધતી ક્ષમતાને દેશના વિવિધ વિસ્તારો સુધી પહોંચાડવા માટે મજબૂત ટ્રાન્સમિશન નેટવર્ક જરૂરી છે. PM-DHARA યોજના આ માળખાને મજબૂત કરીને ગ્રીન એનર્જીને ગ્રિડ સાથે જોડવામાં મહત્વની ભૂમિકા ભજવશે.
