ભારતીયોમાં ચિંતા વધી : પરિવારના અમેરિકા જવાના પ્લાન પર અસર
નવી દિલ્હી :
અમેરિકામાં સ્થાયી થવા ઈચ્છતા ભારતીયો માટે ચિંતાજનક સમાચાર સામે આવ્યા છે. ટ્રમ્પ પ્રશાસને ઇમિગ્રન્ટ વિઝા એટલે કે ગ્રીન કાર્ડ માટેના ફાઈનલ ઇન્ટરવ્યૂ શેડ્યૂલ કરવાની પ્રક્રિયા પર કામચલાઉ રોક લગાવી દીધી છે. જેના કારણે લાંબા સમયથી ગ્રીન કાર્ડની પ્રક્રિયા પૂર્ણ થવાની રાહ જોઈ રહેલા ભારતીય અરજદારોની ચિંતા વધી છે.
ભારતીય પરિવારો પર સીધી અસર
આ નિર્ણયની સૌથી વધુ અસર અમેરિકામાં કામ કરી રહેલા ભારતીય પ્રોફેશનલ્સના જીવનસાથી, નાના બાળકો અને વૃદ્ધ માતા-પિતા પર થઈ રહી છે. ઘણા પરિવારજનોના દસ્તાવેજો પૂર્ણ થઈ ગયા છે અને તેઓ માત્ર અંતિમ ઇન્ટરવ્યૂની રાહ જોઈ રહ્યા હતા.
ઇન્ટરવ્યૂમાં વિલંબ થતાં પરિવારનું અમેરિકા સ્થળાંતર, બાળકોનું શિક્ષણ અને નોકરી-કારકિર્દી સંબંધિત આયોજન પણ ખોરવાઈ શકે છે.
અરજી રદ થઈ નથી
ઇમિગ્રેશન નિષ્ણાતોના જણાવ્યા મુજબ આ નિર્ણયને ગ્રીન કાર્ડની અરજીઓના કાયમી રદ અથવા અસ્વીકાર તરીકે જોવો નહીં. હાલ ઇન્ટરવ્યૂ શેડ્યૂલ કરવાની પ્રક્રિયા પર અસ્થાયી અસર પડી છે.
રોકની અસર માત્ર ભારતીયો પૂરતી મર્યાદિત નથી, પરંતુ વિશ્વભરના અમેરિકી વિઝા સેન્ટરોમાં ઇમિગ્રન્ટ વિઝા પ્રક્રિયા પર તેની અસર જોવા મળી શકે છે.
દસ્તાવેજોની માન્યતા પૂરી થવાની ચિંતા
ભારતીય અરજદારો માટે ઇમિગ્રેશન પ્રક્રિયા સામાન્ય રીતે લાંબી હોય છે. જો રોક લાંબો સમય ચાલુ રહે તો મેડિકલ રિપોર્ટ, પોલીસ ક્લિયરન્સ સર્ટિફિકેટ અને અન્ય જરૂરી દસ્તાવેજોની માન્યતા પૂરી થવાની શક્યતા છે.
આવી સ્થિતિમાં કેટલાક અરજદારોને દસ્તાવેજો ફરીથી મેળવવા પડી શકે છે, જેના કારણે વધારાનો ખર્ચ અને માનસિક પરેશાનીનો સામનો કરવો પડી શકે છે.
સત્તાવાર સૂચનાઓ પર નજર રાખવા અપીલ
કાનૂની નિષ્ણાતોએ અરજદારોને ગભરાયા વગર ધીરજ રાખવા અને અમેરિકી એમ્બેસી તથા કોન્સ્યુલેટ તરફથી આવતા સત્તાવાર ઈ-મેઈલ અને સંદેશાઓ સાચવી રાખવા સલાહ આપી છે.
જે લોકોને અમેરિકામાં રહીને કાયદેસર રીતે સ્ટેટસ એડજસ્ટમેન્ટ કરવાનો વિકલ્પ ઉપલબ્ધ હોય, તેમણે પોતાની પરિસ્થિતિ મુજબ નિષ્ણાતની સલાહ લઈને આ વિકલ્પ પર પણ વિચાર કરવો જોઈએ.
