રશિયાનો પુરવઠો ઘટતાં તુર્કીની ભારત પાસેથી ડીઝલ ખરીદી વધી, અમેરિકા નિકાસ રોકે તો ભારત પર નિર્ભરતા વધી શકે
યુક્રેન-રશિયા સંઘર્ષને કારણે રશિયન રિફાઇનરીઓ પર હુમલાની અસરથી તુર્કીને ડીઝલ માટે વૈકલ્પિક સપ્લાયર્સ તરફ વળવું પડ્યું છે. આ સ્થિતિમાં ભારત અને અમેરિકા તુર્કીના મુખ્ય ડીઝલ સપ્લાયર તરીકે ઉભરી આવ્યા છે.
કેપ્લરના આંકડા મુજબ ઓગસ્ટમાં ભારતે તુર્કીને દરરોજ 1.20 લાખ બેરલથી વધુ ડીઝલ મોકલ્યું હતું, જ્યારે અમેરિકાનો પુરવઠો આશરે 90 હજાર બેરલ પ્રતિદિન રહ્યો હતો. અગાઉ 2025માં તુર્કીની ડીઝલ આયાતમાં રશિયાનો હિસ્સો આશરે 85% હતો, જે ઓગસ્ટમાં ઘટીને લગભગ 20% રહ્યો હતો.
અમેરિકામાં સ્થાનિક માંગને પ્રાથમિકતા આપવાની ચર્ચા
અમેરિકામાં ઈંધણના વધતા ભાવ વચ્ચે સ્થાનિક બજારમાં ડીઝલની ઉપલબ્ધતા જાળવવા નિકાસ પર પ્રતિબંધ મૂકવાની ચર્ચા ચાલી રહી છે. રિપબ્લિકન નેતાઓએ પણ સ્થાનિક ભાવ ઘટાડવા માટે ડીઝલ નિકાસ નિયંત્રણની માંગ કરી છે.
જો અમેરિકા ડીઝલની નિકાસમાં સંપૂર્ણ અથવા આંશિક ઘટાડો કરે અને રશિયાનો પુરવઠો પણ નીચો રહે, તો તુર્કી માટે ભારત પાસેથી ડીઝલ ખરીદી વધારવાનો વિકલ્પ મહત્વનો બની શકે છે.
આ સ્થિતિમાં ભારત-તુર્કી વચ્ચેના ઊર્જા વેપારમાં વધારો થઈ શકે છે, જોકે તુર્કી અન્ય સપ્લાયર્સ પાસેથી પણ ઈંધણ મેળવવાના વિકલ્પો શોધી શકે છે.
