2040 સુધીમાં કેરળમાં ડેંગ્યુના કેસો 16થી 20% વધી શકે, લાંબા ગાળે જોખમ વધુ
કેરળઃ બદલાતું હવામાન આવનારા વર્ષોમાં ડેંગ્યુનું જોખમ વધારી શકે છે. કેરળમાં થયેલા એક નવા અભ્યાસ મુજબ 2021થી 2040 વચ્ચે રાજ્યમાં ડેંગ્યુના કેસોના દરમાં 16થી 20% સુધીનો વધારો થવાની શક્યતા છે.
અભ્યાસમાં વિવિધ જળવાયુ પરિસ્થિતિઓના આધારે 2081થી 2100 વચ્ચે ડેંગ્યુ સંક્રમણમાં 46થી 113% સુધીના વધારાનો અંદાજ લગાવવામાં આવ્યો છે. જોકે આ વાસ્તવિક ભવિષ્યના કેસોની સંખ્યા નહીં, પરંતુ જળવાયુ મોડેલ આધારિત અંદાજ છે.
ગરમી અને ભેજનું સંયોજન મહત્વનું
અભ્યાસ મુજબ ચોમાસા પહેલાં 30.5થી 32.5 ડિગ્રી સેલ્સિયસ તાપમાન અને 66થી 79% ભેજ હોય ત્યારે ડેંગ્યુના કેસો વધવાની શક્યતા વધુ રહે છે. સંશોધકોના જણાવ્યા મુજબ માત્ર વરસાદ કરતાં તાપમાન અને ભેજનું સંયોજન ડેંગ્યુ સંક્રમણ સાથે વધુ મજબૂત રીતે જોડાયેલું જોવા મળ્યું છે.
સમગ્ર દેશ માટે પણ સંકેત
આ અભ્યાસ કેરળના 14 વર્ષના આંકડાઓ પર આધારિત છે, તેથી તેના પરિણામોને સીધા સમગ્ર ભારત પર લાગુ કરી શકાય નહીં. જોકે બદલાતા જળવાયુમાં ડેંગ્યુ સામે અગાઉથી મોનિટરિંગ અને બચાવના પગલાં જરૂરી બની શકે છે તેવો મહત્વનો સંકેત અભ્યાસ આપે છે.
