Instagram, X અને Facebook પર PM મોદી નંબર-1 : કેન્દ્રીય મંત્રીઓની કામગીરીનું મૂલ્યાંકન
નવી દિલ્હી: કેન્દ્રીય મંત્રીઓની સોશિયલ મીડિયા પરની કામગીરીનો વિશેષ રિપોર્ટ તૈયાર કરવામાં આવ્યો છે. બુધવારે મળેલી કેબિનેટ બેઠક દરમિયાન આ રિપોર્ટ તમામ કેન્દ્રીય મંત્રીઓને વ્યક્તિગત રીતે સોંપવામાં આવ્યો હોવાનું જાણવા મળે છે.
આ રિપોર્ટ 1 મે 2026થી 15 ઓગસ્ટ 2026 સુધીના સાડા ત્રણ મહિનાના સમયગાળામાં મંત્રીઓની સોશિયલ મીડિયા સક્રિયતાના આધારે તૈયાર કરાયો છે. ઓવરઓલ સોશિયલ મીડિયા રેન્કિંગમાં વડાપ્રધાન નરેન્દ્ર મોદી પ્રથમ ક્રમે રહ્યા હોવાનું જણાવાયું છે.
કયા માપદંડોના આધારે રેન્કિંગ?
મંત્રીઓની કામગીરીનું મૂલ્યાંકન કરતી વખતે Instagram, X અને Facebook પરની દૈનિક સરેરાશ પોસ્ટ્સ, કુલ એંગેજમેન્ટ, પ્રતિ પોસ્ટ સરેરાશ એંગેજમેન્ટ, લાઈક્સ અને ફોલોઅર્સ જેવા વિવિધ માપદંડો ધ્યાનમાં લેવામાં આવ્યા છે.
રિપોર્ટમાં માત્ર કેન્દ્રીય મંત્રીઓ જ નહીં, પરંતુ દેશના અન્ય ટોચના નેતાઓના સોશિયલ મીડિયા ટ્રેક્શનને પણ સામેલ કરવામાં આવ્યું છે. આથી મંત્રીઓને પોતાનું પ્રદર્શન અન્ય નેતાઓની સરખામણીમાં ચકાસવાની તક મળી છે.
જનતા સાથે સીધો સંવાદ વધારવા ભાર
કેન્દ્રીય મંત્રીઓને સોશિયલ મીડિયા પર વધુ સક્રિય રહેવા અને સરકારની કામગીરી તથા યોજનાઓ અંગે જનતા સાથે અસરકારક સંવાદ વધારવા સૂચના આપવામાં આવી છે. સોશિયલ મીડિયા હવે જનસંપર્કનું મહત્વનું માધ્યમ બન્યું હોવાથી મંત્રીઓની ડિજિટલ હાજરીને પણ મહત્વ અપાઈ રહ્યું છે.
કેબિનેટ ફેરબદલ પહેલાં રિપોર્ટ ચર્ચામાં
મંત્રીઓની સોશિયલ મીડિયા કામગીરીનું આ મૂલ્યાંકન આગામી સમયમાં રાજકીય રીતે પણ મહત્વનું બની શકે છે. ખાસ કરીને આગામી કેબિનેટ ફેરબદલની ચર્ચા વચ્ચે આ રિપોર્ટને મંત્રીઓના ‘ડિજિટલ પરફોર્મન્સ કાર્ડ’ તરીકે જોવામાં આવી રહ્યો છે.
