બાંકે બિહારી મંદિરની વર્ષમાં એકવાર યોજાતી મંગળા આરતીનું પ્રથમવાર લાઈવ પ્રસારણ, મથુરા-વૃંદાવન ભક્તિના રંગે રંગાયું
મથુરા: શ્રીકૃષ્ણ જન્માષ્ટમીના પાવન પર્વને લઈને મથુરા અને વૃંદાવન સંપૂર્ણપણે સજીને તૈયાર થઈ ગયા છે. શહેરના મુખ્ય મંદિરો, ચોક અને રસ્તાઓ પર રંગબેરંગી રોશનીથી શણગાર કરવામાં આવ્યો છે. આ વખતે જન્માષ્ટમીના ઉત્સવમાં સાંસ્કૃતિક કાર્યક્રમો ઉપરાંત 500 ડ્રોનનો વિશેષ લાઈટ શો પણ આકર્ષણનું કેન્દ્ર બનશે.
જન્માષ્ટમી નિમિત્તે બાંકે બિહારી મંદિરની વર્ષમાં માત્ર એકવાર યોજાતી મંગળા આરતીનું પહેલીવાર લાઈવ પ્રસારણ કરવામાં આવશે. આથી દેશ-વિદેશમાં બેઠેલા કૃષ્ણભક્તો પણ આ વિશેષ આરતીના દર્શન કરી શકશે.
500 ડ્રોનથી આકાશમાં કૃષ્ણલીલા
શ્રીકૃષ્ણ જન્મોત્સવ અંતર્ગત દેશભરમાંથી 1000થી વધુ કલાકારો મથુરા પહોંચશે. બે ડઝનથી વધુ નાના મંચો અને લગભગ અડધો ડઝન મુખ્ય મંચો પર વિવિધ સાંસ્કૃતિક કાર્યક્રમો રજૂ કરવામાં આવશે.
મથુરામાં 4 સપ્ટેમ્બરની રાત્રે 9થી 10 વાગ્યા દરમિયાન કિશોરી રમણ બીએડ કોલેજથી 500 ડ્રોનનો વિશેષ લાઈટ શો યોજાશે. આ દરમિયાન આકાશમાં ડ્રોનની મદદથી ભગવાન શ્રીકૃષ્ણની બાળલીલા અને જીવન સાથે જોડાયેલી વિવિધ આકૃતિઓ તૈયાર કરવામાં આવશે.
આજે વૃંદાવન પહોંચશે સીએમ યોગી
ઉત્તર પ્રદેશના મુખ્યમંત્રી યોગી આદિત્યનાથ આજે વૃંદાવન પહોંચશે. રાત્રિ રોકાણ બાદ તેઓ આવતીકાલે શ્રીકૃષ્ણ જન્મસ્થાન પહોંચીને દર્શન-પૂજન કરશે. આ દરમિયાન તેઓ અંદાજે રૂ.446 કરોડની વિવિધ વિકાસ યોજનાઓનું લોકાર્પણ અને શિલાન્યાસ કરશે.
સુરક્ષા માટે ચુસ્ત બંદોબસ્ત
જન્માષ્ટમીના ભારે ભીડભાડને ધ્યાનમાં રાખીને મથુરા-વૃંદાવનની સુરક્ષા વ્યવસ્થા પણ વધુ કડક કરવામાં આવી છે. સમગ્ર વિસ્તારને 7 ઝોન અને 35 સેક્ટરમાં વહેંચવામાં આવ્યો છે. પોલીસ અને સુરક્ષા દળોને અલગ-અલગ વિસ્તારોમાં તૈનાત કરવામાં આવ્યા છે.
3થી 5 સપ્ટેમ્બર સુધી ટ્રાફિકમાં ફેરફાર
જન્માષ્ટમી દરમિયાન મોટી સંખ્યામાં શ્રદ્ધાળુઓ મથુરા-વૃંદાવન પહોંચવાના હોવાથી ટ્રાફિક વ્યવસ્થામાં પણ ફેરફાર કરવામાં આવ્યો છે. 3 સપ્ટેમ્બરથી સવારે 9 વાગ્યાથી અનેક માર્ગો પર ટ્રાફિક ડાયવર્ઝન લાગુ કરવામાં આવશે. ભક્તો અને વાહનચાલકોને વૈકલ્પિક માર્ગોનો ઉપયોગ કરવાની સલાહ આપવામાં આવી છે.
આ વખતે મથુરા-વૃંદાવનમાં ધાર્મિક આસ્થા, ભવ્ય રોશની, સાંસ્કૃતિક કાર્યક્રમો અને ટેક્નોલોજીનો સંગમ જોવા મળશે.
