તહેવારોની સીઝન વચ્ચે કઠોળના ભાવમાં સતત વધારો થતાં ગૃહિણીઓનું બજેટ વધુ ખોરવાઈ શકે છે. ચણા, મગ, મટર, તુવેર અને મસૂર સહિતની દાળના ભાવમાં છેલ્લા એક મહિનામાં સરેરાશ 10% જેટલો વધારો નોંધાયા બાદ આ સપ્તાહે પણ 3થી 5% સુધીનો ભાવવધારો જોવા મળ્યો છે.
અનિયમિત ચોમાસાને કારણે આ વર્ષે કઠોળનું ઉત્પાદન કેટલું રહેશે તે અંગે અનિશ્ચિતતા છે. બીજી તરફ દિવાળી સહિતના તહેવારોને કારણે માંગમાં વધારો થતાં ભાવ પર વધુ દબાણ આવ્યું છે. ઇન્ડિયન પલ્સ એન્ડ ગ્રેન એસોસિએશનના જણાવ્યા મુજબ મહત્વના કઠોળના ભાવમાં સતત વધારો નોંધાઈ રહ્યો છે.
તુવેરના ભાવમાં ગયા મહિને 6.5%નો વધારો થયા બાદ આ સપ્તાહે વધુ 2.4%નો વધારો થયો છે. મગના ભાવમાં પણ લગભગ 14%નો વધારો નોંધાયો છે, જ્યારે વાર્ષિક ધોરણે કેટલાક કઠોળના ભાવમાં 24થી 47% સુધીનો ઉછાળો જોવા મળ્યો છે. મસૂરની દાળના ભાવમાં પણ વધારો થયો છે.
ચણાના ભાવ પર પણ દબાણ જોવા મળી રહ્યું છે. ચણાનો ઉપયોગ વિવિધ ખાદ્ય ચીજોમાં થતો હોવાથી તેની માંગ ઊંચી રહે છે. સાથે જ રવિ પાક દરમિયાન હવામાન અને ભેજની સ્થિતિ કેવી રહેશે તે અંગેની અનિશ્ચિતતાને કારણે ચણાના ભાવમાં પણ વધારો થવાની શક્યતા છે.
ગત વર્ષે માંગને પહોંચી વળવા ઓસ્ટ્રેલિયાથી ચણાની આયાત કરવામાં આવી હતી. હવે ચોમાસા બાદ ઉત્પાદન અને તહેવારોની માંગનું ચિત્ર સ્પષ્ટ થયા બાદ કઠોળના ભાવની દિશા નક્કી થશે. હાલના વધારાને કારણે દિવાળી પહેલાં સામાન્ય પરિવારના રસોડાના બજેટ પર વધુ ભાર પડવાની શક્યતા છે.
