ટીમ ઈન્ડિયાના ચીફ સિલેક્ટર અજીત અગરકરના ભવિષ્યને લઈને મોટું સસ્પેન્સ ઊભું થયું છે. સપ્ટેમ્બરમાં તેમનો સત્તાવાર કાર્યકાળ પૂર્ણ થઈ ગયો છે, પરંતુ BCCI તેમનો કોન્ટ્રેક્ટ લંબાવવાના પક્ષમાં હોવા છતાં અગરકર તરફથી હજુ સુધી સકારાત્મક સંકેતો મળ્યા નથી. રિપોર્ટ્સ મુજબ BCCI આજે અગરકર સાથે તેમના કોન્ટ્રેક્ટ અંગે ચર્ચા કરશે અને આગામી 48 કલાકમાં તેમના ભવિષ્ય અંગે ચિત્ર સ્પષ્ટ થઈ શકે છે.
આ સમગ્ર મામલો એવા સમયે સામે આવ્યો છે જ્યારે આગામી વર્ષે ત્રણ દેશોમાં યોજાનારા 50 ઓવરના વર્લ્ડ કપની તૈયારીઓ શરૂ થઈ ગઈ છે. આવી સ્થિતિમાં ચીફ સિલેક્ટરમાં ફેરફાર થાય તો ટીમની વર્લ્ડ કપ પ્લાનિંગને અસર થવાની આશંકા છે.
અગરકરનું ચાલુ રહેવું કેમ મહત્વનું?
વર્લ્ડ કપ માટે ટીમની પસંદગી અને પ્લાનિંગ મહત્વના તબક્કામાં છે. જો અત્યારે નવો ચીફ સિલેક્ટર આવે તો તેને કેપ્ટન, ખેલાડીઓ, હેડ કોચ ગૌતમ ગંભીર અને BCCI સાથે તાલમેલ બેસાડવામાં સમય લાગી શકે છે.
નવી વ્યક્તિ માટે ટૂંકા સમયમાં સમગ્ર સિસ્ટમ સમજવી અને વર્લ્ડ કપની તૈયારીઓની જવાબદારી સંભાળવી પણ મોટો પડકાર બની શકે છે. તેથી BCCI અગરકરનો કાર્યકાળ લંબાવવા માંગે છે.
રોહિત શર્મા મુદ્દે અગરકર અને BCCI વચ્ચે મતભેદ?
સમગ્ર વિવાદના કેન્દ્રમાં રોહિત શર્મા હોવાનું માનવામાં આવી રહ્યું છે. વર્લ્ડ કપની લાંબા ગાળાની યોજના અંતર્ગત સિલેક્શન કમિટી અને હેડ કોચ ગૌતમ ગંભીર યુવા ઓપનરને તક આપવાના પક્ષમાં હોવાનું કહેવાય છે.
રોહિતને પણ આ આયોજન અંગે જાણ કરવામાં આવી હતી. ત્યારબાદ તેણે BCCIના અધિકારીઓ સાથે વાત કરી હતી. બોર્ડના સચિવે રોહિતનું સમર્થન કરતા કહ્યું હતું કે તે સારું પ્રદર્શન કરી રહ્યો છે અને જ્યાં સુધી તેનું પ્રદર્શન સારું રહેશે ત્યાં સુધી તે રમતો રહેશે.
અગરકરે મીટિંગથી બનાવી દૂરી
રોહિત શર્મા મુદ્દે BCCIના વલણની અસર અજીત અગરકર પર પણ પડી હોવાનું કહેવાય છે. તાજેતરમાં યોજાયેલી ટીમ રિવ્યુ અને વર્લ્ડ કપ પ્લાનિંગ મીટિંગમાં અગરકર હાજર રહ્યા નહોતા. તેઓ ઓનલાઈન પણ જોડાયા ન હતા.
આ ઘટનાએ અગરકર ચીફ સિલેક્ટર તરીકે ચાલુ રહેશે કે નહીં તે અંગે ચર્ચાને વધુ વેગ આપ્યો છે. એક તરફ BCCI તેમને જાળવી રાખવા માંગે છે, તો બીજી તરફ અગરકરનું વલણ અલગ હોવાનું કહેવાય છે.
આગામી 48 કલાકમાં થશે નિર્ણય
હવે BCCI અને અજીત અગરકર વચ્ચેની બેઠક અત્યંત મહત્વની બની છે. રોહિત શર્માને લઈને સિલેક્શન કમિટી અને BCCI વચ્ચેના મતભેદો ચીફ સિલેક્ટરના ભવિષ્ય પર કેટલી અસર કરે છે તે આગામી 48 કલાકમાં સ્પષ્ટ થઈ શકે છે. વર્લ્ડ કપની તૈયારીઓ વચ્ચે અગરકર પદ પર રહેશે કે નવી વ્યક્તિને જવાબદારી સોંપાશે તેના પર ક્રિકેટ જગતની નજર છે.
