કોલંબોમાં રમાયેલી બીજી ટેસ્ટના પ્રથમ દિવસે મેદાન પર થયેલા વિવાદને લઈને ભારતીય ઓપનર યશસ્વી જયસ્વાલ અને શ્રીલંકાના ફાસ્ટ બોલર અસિતા ફર્નાન્ડો સામે ICCએ કાર્યવાહી કરી છે. બંને ખેલાડીઓને મેચ ફીના 25 ટકા દંડની સજા ફટકારવામાં આવી છે. સાથે બંનેના શિસ્તભંગના રેકોર્ડમાં એક-એક ડીમેરિટ પોઇન્ટ પણ ઉમેરવામાં આવ્યો છે.
ICCના જણાવ્યા અનુસાર બંને ખેલાડીઓએ પોતાના પર લાગેલા આરોપો સ્વીકારી લીધા હતા. ICC એલિટ પેનલના મેચ રેફરી એન્ડી પાઇક્રોફ્ટ દ્વારા સૂચવવામાં આવેલી સજા પણ બંનેએ સ્વીકારી હોવાથી આ મામલે અલગથી ઔપચારિક સુનાવણી યોજવાની જરૂર પડી નહોતી.
ICCના નિયમ 2.12 હેઠળ દોષિત
યશસ્વી જયસ્વાલ અને અસિતા ફર્નાન્ડોને ICC આચાર સંહિતાના નિયમ 2.12ના ભંગ બદલ દોષિત ઠેરવવામાં આવ્યા છે. આ નિયમ આંતરરાષ્ટ્રીય મેચ દરમિયાન ખેલાડી, સપોર્ટ સ્ટાફ, અમ્પાયર, મેચ રેફરી અથવા અન્ય વ્યક્તિ સાથે અનુચિત શારીરિક સંપર્ક કરવા સંબંધિત છે.
મેદાની અમ્પાયરો તથા ચોથા અમ્પાયરે બંને ખેલાડીઓ સામે આરોપ લગાવ્યા હતા, ત્યારબાદ મામલો મેચ રેફરી સમક્ષ પહોંચ્યો હતો.
ICCએ જણાવ્યું કે બંને ખેલાડીઓના છેલ્લા 24 મહિનાના શિસ્તભંગના રેકોર્ડમાં કોઈ અગાઉનો ગુનો નહોતો. તેથી બંનેના રેકોર્ડમાં એક-એક ડીમેરિટ પોઇન્ટ ઉમેરવામાં આવ્યો છે.
મેદાન પર થયેલા વિવાદ બાદ ICCની કાર્યવાહીથી મામલો હાલ પૂરતો સમાપ્ત થયો છે અને બંને ખેલાડીઓ આગામી મેચોમાં આ પ્રકારના વર્તનથી દૂર રહે તેવી અપેક્ષા રહેશે.
