બોમ્બે હાઈકોર્ટને મળ્યો ધમકીભર્યો ઈમેલ; BSE અને વર્લી રેસકોર્સનાં નામનો પણ ઉલ્લેખ, પોલીસ દ્વારા તપાસ
મુંબઈમાં બોમ્બ વિસ્ફોટની ધમકીભર્યો ઈમેલ મળતાં સુરક્ષા તંત્ર સતર્ક બન્યું છે. ઈમેલમાં અભિનેતા અમિતાભ બચ્ચનના જુહુ સ્થિત બંગલા ‘જલસા’, બોમ્બે હાઈકોર્ટ, બોમ્બે સ્ટોક એક્સચેન્જ (BSE) અને વર્લી રેસકોર્સ સહિતનાં સ્થળોને નિશાન બનાવવાની ચેતવણી આપવામાં આવી છે.
પોલીસ અને સુરક્ષા એજન્સીઓ સતર્ક
અહેવાલ મુજબ, ધમકીભર્યો ઈમેલ બોમ્બે હાઈકોર્ટને મળ્યો હતો. તેમાં વિવિધ સ્થળોએ શ્રેણીબદ્ધ વિસ્ફોટ કરવાનો દાવો કરવામાં આવ્યો હતો. ઈમેલ મળ્યા બાદ પોલીસે તપાસ શરૂ કરી છે અને મોકલનારની ઓળખ તથા ઈમેલના સ્ત્રોતની તપાસ હાથ ધરી છે.
અમિતાભ બચ્ચનને અગાઉ પણ ધમકીમાં નામ
22 ઓક્ટોબરે એક શાળાને મળેલા ધમકીભર્યા ઈમેલમાં પણ અમિતાભ બચ્ચનનું નામ આવ્યું હતું. જોકે, તે સમયે તેમને સીધી ધમકી આપવામાં આવી ન હોવાનું સ્પષ્ટ કરાયું હતું. ત્યારબાદ તેઓ પુત્ર અભિષેક સાથે સુરક્ષિત કાચની આડમાં ઊભા રહી ચાહકોનું અભિવાદન કરતા જોવા મળ્યા હતા.
અન્ય કલાકારોને પણ ધમકીઓ
તાજેતરમાં ટાઈગર શ્રોફની કાર પર ફાયરિંગની ઘટના બાદ તુષાર કપૂર અને આયુષ્માન ખુરાનાને પણ ધમકીભર્યા સંદેશા મળ્યાના અહેવાલો સામે આવ્યા હતા. આ મામલે મુંબઈ ક્રાઈમ બ્રાન્ચે બેંગલુરુના એક 30 વર્ષીય આઈટી એન્જિનિયરની ધરપકડ કરી હતી. જોકે, તેની લોરેન્સ બિશ્નોઈ ગેંગ સાથેની કડી અંગે કોઈ સત્તાવાર પુષ્ટિ થઈ નથી.
મુંબઈ પોલીસ હાલ તાજેતરની ધમકીની ગંભીરતાથી તપાસ કરી રહી છે. ઈમેલમાં કરાયેલા દાવાની સત્યતા અને કોઈ વાસ્તવિક જોખમ છે કે નહીં તે તપાસ બાદ જ સ્પષ્ટ થશે.
