વૈભવ મિશ્રાની મુંબઈ ક્રાઈમ બ્રાન્ચે અટકાયત કરી; લોરેન્સ બિશ્નોઈ ગેંગ સાથે જોડાયેલો હોવાનો દાવો કરીને ઓડિયો મેસેજ મોકલ્યા હોવાનો આરોપ
મુંબઈ: બોલિવૂડ કલાકારોને ધમકીભર્યા સંદેશા મળવાના બનાવો વચ્ચે અભિનેતા આયુષ્માન ખુરાના અને તુષાર કપૂરને ધમકી આપવાના કેસમાં મુંબઈ પોલીસને સફળતા મળી છે. મુંબઈ ક્રાઈમ બ્રાન્ચે આ મામલે વૈભવ મિશ્રા નામના આઈટી એન્જિનિયરની બેંગલુરુથી અટકાયત કરી છે. આરોપી લોરેન્સ બિશ્નોઈ ગેંગ સાથે જોડાયેલો હોવાનો દાવો કરીને બંને અભિનેતાઓ સહિત અન્ય લોકોને ધમકીભર્યા ઓડિયો મેસેજ મોકલતો હોવાનો આક્ષેપ છે.
પોતાને બિશ્નોઈ ગેંગનો સભ્ય ગણાવી ધમકી આપી
પોલીસના જણાવ્યા અનુસાર, આયુષ્માન ખુરાનાને એક ઓડિયો ક્લિપ મળી હતી, જેમાં મેસેજ મોકલનારે પોતાને લોરેન્સ બિશ્નોઈ ગેંગનો સભ્ય ગણાવ્યો હતો. આ ઓડિયો દ્વારા અભિનેતા પાસે કરોડો રૂપિયાની ખંડણી માગવામાં આવી હોવાનો આરોપ છે. આ મામલે મુંબઈ પોલીસની ક્રાઈમ બ્રાન્ચે તપાસ શરૂ કરી હતી અને ટેક્નિકલ વિગતોના આધારે વૈભવ મિશ્રા સુધી પહોંચવામાં આવી હતી.
તુષાર કપૂર પાસે પણ રૂ. 5 કરોડની માગણી
આ અગાઉ અભિનેતા તુષાર કપૂરને પણ ધમકીભર્યો ઓડિયો મેસેજ મળ્યો હતો. તેમાં મેસેજ મોકલનારે પોતાને લોરેન્સ બિશ્નોઈ ગેંગનો ‘હેરી બોક્સર’ ગણાવ્યો હતો અને રૂ. 5 કરોડની ખંડણી માગી હતી. બંને કેસમાં મળેલા ધમકીભર્યા સંદેશાઓ વચ્ચે કોઈ સંબંધ છે કે કેમ તે દિશામાં પણ તપાસ કરવામાં આવી રહી છે.
ઓડિયો અને ડિજિટલ પુરાવાની તપાસ
મુંબઈ પોલીસ દ્વારા આરોપી પાસેથી મળેલા ડિજિટલ પુરાવા, મેસેજ મોકલવા માટે ઉપયોગમાં લેવાયેલા નંબર અને ઓડિયો ક્લિપની તપાસ કરવામાં આવી રહી છે. ઓડિયોમાં સંભળાતા અવાજના નમૂનાની પણ સરખામણી કરવામાં આવી રહી છે, જેથી ધમકી મોકલનારની ઓળખ અને સમગ્ર ઘટનાક્રમ અંગે વધુ સ્પષ્ટતા થઈ શકે.
ટાઈગર શ્રોફ પર થયેલી ગોળીબારની ઘટના અને અન્ય બોલિવૂડ કલાકારોને મળેલી ધમકીઓ બાદ ફિલ્મજગતમાં સુરક્ષાને લઈને ચિંતા વધી છે. જોકે, વૈભવ મિશ્રાનો લોરેન્સ બિશ્નોઈ ગેંગ સાથે ખરેખર કોઈ સંબંધ છે કે નહીં તે અંગે પોલીસ તપાસ બાદ જ સ્પષ્ટતા થશે.
