નાણા, સંરક્ષણ અને વિદેશ મંત્રાલયમાં ફેરફાર નહીં થાય તેવી ચર્ચા; નીતિન ગડકરીના ખાતામાં ફેરફારની અટકળો
નવી દિલ્હી: કેન્દ્રની મોદી સરકારમાં સંભવિત કેબિનેટ વિસ્તરણની ચર્ચા ફરી એકવાર તેજ બની છે. ભાજપના રાષ્ટ્રીય અધ્યક્ષ નીતિન નબીનની નવી ટીમની રચના પૂર્ણ થયા બાદ હવે મોદી સરકારમાં પણ કેટલાક નવા ચહેરાઓને સ્થાન મળે તેવી અટકળો ચાલી રહી છે.
વડાપ્રધાન નરેન્દ્ર મોદી વિદેશ પ્રવાસ પૂર્ણ કરીને ભારત પરત ફર્યા બાદ સરકારની કામગીરીમાં વ્યસ્ત છે. દરમિયાન તાજેતરની કેબિનેટ બેઠકમાં વડાપ્રધાન મોદીએ મંત્રીઓને જણાવ્યું હોવાનું સામે આવ્યું છે કે આગામી કેબિનેટ બેઠકમાં કેટલાક નવા સાથીદારો જોડાશે. આ નિવેદનને કેબિનેટ વિસ્તરણના સંકેત તરીકે જોવામાં આવી રહ્યું છે.
5થી 7 સપ્ટેમ્બર વચ્ચે વિસ્તરણની શક્યતા
માહિતગાર વર્તુળોમાં ચર્ચા છે કે 5થી 7 સપ્ટેમ્બર દરમિયાન કેબિનેટ વિસ્તરણ થઈ શકે છે. જોકે આ અંગે હજુ સુધી સત્તાવાર જાહેરાત કરવામાં આવી નથી.
સરકારના આગામી દિવસો પણ વ્યસ્ત રહેવાના છે. નાણામંત્રી નિર્મલા સીતારામન અમેરિકા-કેનેડાની મુલાકાત પૂર્ણ કરીને પરત ફર્યા છે, જ્યારે વિદેશમંત્રી એસ. જયશંકર પોલેન્ડ અને યુક્રેનના પ્રવાસે છે. ત્યારબાદ નવી દિલ્હીમાં BRICS શિખર સંમેલન સહિતના કાર્યક્રમો યોજાવાના છે.
ચાર મહત્વના મંત્રાલયોમાં ફેરફાર નહીં?
ચર્ચા મુજબ કેબિનેટ વિસ્તરણમાં નાણા, સંરક્ષણ અને વિદેશ સહિતના મહત્વના મંત્રાલયોમાં મોટા ફેરફાર કરવામાં નહીં આવે. જોકે માર્ગ પરિવહન અને હાઈવે મંત્રી નીતિન ગડકરીના ખાતામાં ફેરફાર થવાની અટકળો ચાલી રહી છે.
ગડકરી અગાઉ E-20 પેટ્રોલના મુદ્દે ચર્ચામાં રહ્યા હતા. બીજી તરફ પેટ્રોલિયમ મંત્રી હરદીપસિંહ પુરીની રાજ્યસભાની ટર્મ પૂરી થવા જઈ રહી હોવાથી તેમના ભવિષ્ય અંગે પણ રાજકીય વર્તુળોમાં ચર્ચા ચાલી રહી છે.
70 વર્ષથી વધુ ઉંમરના કેટલાક મંત્રીઓની વિદાય?
કેન્દ્ર સરકારમાં 70 વર્ષથી વધુ ઉંમરના અનેક મંત્રીઓ છે. કેબિનેટમાં યુવા ચહેરાઓને વધુ સ્થાન આપવા માટે કેટલાક વરિષ્ઠ મંત્રીઓની જવાબદારીમાં ફેરફાર અથવા તેમને સરકારમાંથી વિદાય આપવામાં આવે તેવી પણ અટકળો છે.
યુવા ચહેરાઓને તક મળવાની શક્યતા
સંભવિત વિસ્તરણમાં યુવા સાંસદોને સ્થાન મળે તેવી ચર્ચા છે. તેમાં ઉત્તર પ્રદેશના સાંસદ અને અભિનેતા રવિ કિશનનું નામ પણ ચર્ચામાં છે. રવિ કિશનની લોકપ્રિયતા અને ઉત્તર પ્રદેશમાં બ્રાહ્મણ ચહેરાની રાજકીય જરૂરિયાતને ધ્યાનમાં રાખીને તેમના નામ અંગે અટકળો ચાલી રહી છે.
સહયોગી પક્ષો પર પણ નજર
મોદી સરકારના સંભવિત વિસ્તરણમાં નવા સાથી પક્ષોને પણ સ્થાન મળે તેવી શક્યતા વ્યક્ત કરવામાં આવી રહી છે. ખાસ કરીને શિવસેનાના એકનાથ શિંદે જૂથનું નામ મહત્વપૂર્વક ચર્ચાઈ રહ્યું છે.
આ ઉપરાંત આમ આદમી પાર્ટીના કેટલાક બળવાખોર સાંસદો અંગે પણ રાજકીય ચર્ચા ચાલી રહી છે. તેમાં રાઘવ ચઢ્ઢાનું નામ પણ સામે આવી રહ્યું છે. તેમને સંસદીય જવાબદારી આપવામાં આવી હોવાથી ભવિષ્યમાં કેન્દ્ર સરકારમાં સ્થાન મળે તેવી અટકળો ચાલી રહી છે.
હવે સૌથી મોટો સવાલ એ છે કે કેબિનેટ વિસ્તરણમાં કયા જૂના ચહેરાઓની જવાબદારી બદલાશે અને કયા નવા ચહેરાઓને મોદી સરકારમાં સ્થાન મળશે. સત્તાવાર નિર્ણય બાદ જ આ અંગેનું ચિત્ર સ્પષ્ટ થશે.
