નવી દિલ્હી: વિશ્વમાં ચાલી રહેલા યુદ્ધો, વેપાર-ટેરિફ અને વધતા ભૌગોલિક રાજકીય તણાવ વચ્ચે અમેરિકા, રશિયા અને ચીનના નેતાઓ એક જ મંચ પર આવે તેવી શક્યતા વધી રહી છે. આગામી નવેમ્બરમાં ચીનના શેન્ઝેન શહેરમાં યોજાનારી એશિયા-પેસિફિક ઈકોનોમિક કો-ઓપરેશન (APEC) બેઠક દરમિયાન અમેરિકાના રાષ્ટ્રપતિ ડોનાલ્ડ ટ્રમ્પ, રશિયાના રાષ્ટ્રપતિ વ્લાદીમીર પુટીન અને ચીનના રાષ્ટ્રપતિ શી જીનપિંગ વચ્ચે મહત્વપૂર્ણ બેઠક યોજાય તેવી ચર્ચા છે.
તાજેતરમાં કિર્ગીસ્તાનમાં યોજાયેલી શાંઘાઈ કોઓપરેશન ઓર્ગેનાઈઝેશનની બેઠક દરમિયાન પુટીન અને શી જીનપિંગ વચ્ચે મુલાકાત થઈ હતી. હવે આગામી APEC શિખર બેઠક દરમિયાન આ બંને નેતાઓ ઉપરાંત ટ્રમ્પ પણ હાજર રહે તો ત્રણેય શક્તિશાળી દેશોના નેતાઓ વચ્ચે સીધી વાતચીતનો માર્ગ ખુલી શકે છે.
જોકે, ટ્રમ્પે હજુ સુધી APEC બેઠકમાં પોતાની હાજરીની સત્તાવાર પુષ્ટિ કરી નથી. ટ્રમ્પ અને શી જીનપિંગ વચ્ચે અગાઉ પણ મહત્વપૂર્ણ ચર્ચાઓ થઈ ચૂકી છે. બીજી તરફ, શી જીનપિંગના અમેરિકા પ્રવાસ અંગે પણ ચર્ચા ચાલી રહી છે. આવી સ્થિતિમાં શેન્ઝેનમાં APEC બેઠકની સમાંતર ત્રણેય નેતાઓ વચ્ચે અલગ બેઠક યોજાવાની શક્યતા વ્યક્ત કરવામાં આવી રહી છે.
આ સંભવિત બેઠકને અનૌપચારિક રીતે ‘જી-3’ તરીકે જોવામાં આવી રહી છે. અમેરિકા, રશિયા અને ચીન વિશ્વની ત્રણ સૌથી પ્રભાવશાળી શક્તિઓમાં સામેલ હોવાથી ત્રણેય દેશોના નેતાઓની સીધી વાતચીત વૈશ્વિક રાજકારણ માટે મહત્વપૂર્ણ બની શકે છે.
હાલ વિશ્વ અનેક યુદ્ધો, વેપાર વિવાદો અને ટેરિફના કારણે ગંભીર પડકારોનો સામનો કરી રહ્યું છે. જો ટ્રમ્પ, પુટીન અને શી જીનપિંગ એક સાથે બેઠક કરે તો યુદ્ધ, વેપાર, ટેરિફ અને વૈશ્વિક આર્થિક સ્થિરતા જેવા મુદ્દાઓ પર ચર્ચા થઈ શકે છે. જોકે, ત્રણેય નેતાઓ વચ્ચે કોઈ ઔપચારિક બેઠક યોજાશે કે નહીં તે અંગે હજુ અંતિમ નિર્ણય જાહેર થયો નથી.
ગત મે મહિનામાં પણ ત્રણેય દેશોના નેતાઓ એક જ સ્થળે હાજર રહ્યા હતા, પરંતુ તે સમયે તેમની વચ્ચે અલગથી ત્રિપક્ષીય બેઠક યોજાઈ નહોતી. હવે નવેમ્બરની APEC બેઠક પર સમગ્ર વિશ્વની નજર રહેશે.
