PM મોદીની સ્પષ્ટ સૂચના હતી : હુમલાનો સમય તમે નક્કી કરો, પરંતુ નિષ્ફળતાને કોઈ સ્થાન નહીં
પહેલગામ આતંકી હુમલા બાદ ભારતે હાથ ધરેલા ઓપરેશન સિંદૂર અંગે પૂર્વ ચીફ ઓફ ડિફેન્સ સ્ટાફ જનરલ અનિલ ચૌહાણે મહત્વની માહિતી જાહેર કરી છે. તેમણે સ્પષ્ટતા કરી કે પાકિસ્તાનના કિરાનાહિલ્સ વિસ્તારમાં આવેલા પરમાણુ સંબંધિત સ્થળને ભારતે ઇરાદાપૂર્વક નિશાન બનાવ્યું ન હતું.
અનિલ ચૌહાણના જણાવ્યા મુજબ, ભારતે સરગોધા વિસ્તારમાં પાકિસ્તાની રડારને શોધવા માટે લોઇટરિંગ મ્યુનિશન મોકલ્યા હતા. આ હથિયારોને નિર્ધારિત સમય સુધી લક્ષ્ય શોધવાનું હતું. જો રડાર ટાર્ગેટ ન મળે તો તેની કામગીરી પૂર્ણ થયા બાદ તે નીચે ઉતરવાનું હતું. આ દરમિયાન એક મ્યુનિશન સરગોધાથી આશરે 10 કિલોમીટર દૂર આવેલા કિરાનાહિલ્સ વિસ્તારમાં જઈને પહાડી સાથે અથડાયું હોવાની શક્યતા છે.
કિરાનાહિલ્સને લઈને અગાઉ પણ ચર્ચા થઈ હતી કે ત્યાં પાકિસ્તાનની પરમાણુ ક્ષમતા સાથે જોડાયેલી સુવિધાઓ હોવાની માહિતી છે. જોકે, ભારતીય સેનાએ તેને પોતાના નિર્ધારિત ટાર્ગેટ તરીકે પસંદ કર્યો ન હતો. જનરલ ચૌહાણે અગાઉની સ્પષ્ટતાને પણ સમર્થન આપ્યું હતું કે કિરાનાહિલ્સ ભારતનું નિશાન નહોતું.
ઓપરેશન સિંદૂરના આયોજન અંગે જનરલ ચૌહાણે જણાવ્યું કે ભારતે સૈન્ય કાર્યવાહી માટે રાજકીય અને સૈન્ય લક્ષ્યો વચ્ચે સ્પષ્ટ સમન્વય રાખ્યો હતો. આ કાર્યવાહી દરમિયાન પાકિસ્તાનના વિવિધ સૈન્ય ઠેકાણાઓને નિશાન બનાવવામાં આવ્યા હતા.
આ ખુલાસાથી કિરાનાહિલ્સ અંગે લાંબા સમયથી ચાલી રહેલી અટકળો પર મહત્વપૂર્ણ સ્પષ્ટતા આવી છે. ખાસ વાત એ છે કે કિરાનાહિલ્સ પર કોઈ કાર્યવાહી થઈ હોય તો તે નિર્ધારિત હુમલો નહીં પરંતુ સંભવિત રીતે અનિચ્છિત ઘટના હતી, એવું પૂર્વ CDSના નિવેદન પરથી સ્પષ્ટ થાય છે.
