વિશ્વભરમાં ક્રૂડ ઓઈલના પુરવઠાને લઈને ચિંતા વચ્ચે ઈરાને હોર્મુઝ જળમાર્ગ ફરી ખોલવા અને લાંબા સમયથી ચાલી રહેલા સંઘર્ષના ઉકેલ માટે અમેરિકાને નવી દરખાસ્ત આપી છે. ઈરાનના વિદેશ મંત્રી અબ્બાસ અરાઘચીના જણાવ્યા અનુસાર, અમેરિકાએ શરતો સ્વીકાર્યા બાદ 7 દિવસમાં હોર્મુઝ જળમાર્ગ ખોલવાની અને ત્યારબાદ બંને દેશો વચ્ચે સત્તાવાર વાટાઘાટો શરૂ કરવાની યોજના છે.
ઈરાનના મધ્યસ્થીઓએ આ દરખાસ્ત વ્હાઇટ હાઉસ સુધી પહોંચાડી છે. હોર્મુઝ જળમાર્ગ પર્શિયન ગલ્ફ અને ઓમાનની ખાડી વચ્ચે આવેલો મહત્વપૂર્ણ દરિયાઈ માર્ગ છે અને વૈશ્વિક ઊર્જા પુરવઠા માટે તેનું વ્યૂહાત્મક મહત્વ છે. ઈરાની પક્ષના જણાવ્યા મુજબ, કરારની શરતો સ્વીકારાયા બાદ 7 દિવસની સમયમર્યાદા શરૂ થશે.
પરમાણુ કાર્યક્રમ મુદ્દે હજુ મતભેદ
નવી દરખાસ્તમાં ઈરાનના પરમાણુ કાર્યક્રમ અંગે શું શરતો છે તે અંગે હજુ સ્પષ્ટતા કરવામાં આવી નથી. અમેરિકા ઈરાનના પરમાણુ કાર્યક્રમ પર કડક નિયંત્રણો ઇચ્છે છે, જ્યારે ઈરાન પોતાના નાગરિક પરમાણુ કાર્યક્રમને ચાલુ રાખવાના અધિકાર પર ભાર મૂકે છે. બંને દેશો વચ્ચે આ મુદ્દે લાંબા સમયથી મતભેદ ચાલી રહ્યા છે.
અમેરિકાનું વલણ પણ સ્પષ્ટ
અમેરિકી અધિકારીઓના જણાવ્યા અનુસાર, મધ્યસ્થીઓ મારફતે ચર્ચા ચાલી રહી છે, પરંતુ અમેરિકા કોઈ ઉતાવળમાં નિર્ણય લેવા માંગતું નથી. હોર્મુઝ જળમાર્ગની સ્થિતિ અને તેની સુરક્ષા અંગે પણ અમેરિકાનું ધ્યાન કેન્દ્રિત છે.
ઈરાનના રાષ્ટ્રપતિ મસૂદ પેઝેશ્કિયાને જણાવ્યું છે કે સંઘર્ષનો અંત લાવવાનો નિર્ણય અમેરિકાના વલણ પર નિર્ભર છે. તેમનું કહેવું છે કે ઈરાન તણાવ વધારવા માંગતું નથી, પરંતુ દબાણ સામે ઝૂકશે નહીં.
હોર્મુઝ જળમાર્ગ ફરી ખુલશે કે નહીં અને બંને દેશો વચ્ચે વાટાઘાટો શરૂ થશે કે નહીં તે હવે આગામી દિવસોમાં અમેરિકાના જવાબ પર નિર્ભર રહેશે.
