ઓસ્ટ્રેલિયાથી અમેરિકા મોકલવામાં આવી રહેલા F-35 ફાઇટર જેટના બે મહત્વપૂર્ણ પાર્ટ્સ અચાનક હોંગકોંગ પહોંચી ગયા હોવાની ઘટના સામે આવી છે. Bloombergના અહેવાલ મુજબ, ચીનના સત્તાવાળાઓએ બાદમાં આ પાર્ટ્સ પોતાના કબજામાં લીધા હોવાનું સૂત્રોએ જણાવ્યું છે. જોકે, ચીને આ ઘટનાની જાણકારી હોવાનો ઇનકાર કર્યો છે અને અમેરિકી અધિકારીઓએ પણ ચીનના કબજાની સત્તાવાર પુષ્ટિ કરી નથી.
કયા પાર્ટ્સ હતા?
આ કન્સાઇનમેન્ટમાં ઓસ્ટ્રેલિયન એરફોર્સના F-35Aના કોકપિટ કેનોપી અને વેપન્સ-બે ડોર સામેલ હતા. આ પાર્ટ્સને ઓસ્ટ્રેલિયાથી અમેરિકા તપાસ, રિપેર અથવા નિકાલ માટે મોકલવામાં આવી રહ્યા હતા. રસ્તામાં શિપમેન્ટ દક્ષિણ કોરિયા પહોંચ્યા બાદ હોંગકોંગ તરફ ડાયવર્ટ થયું હતું. તેને હોંગકોંગ કેમ મોકલવામાં આવ્યું તે હજુ સ્પષ્ટ થયું નથી.
સ્ટેલ્થ ટેક્નોલોજીને લઈને ચિંતા
રિપોર્ટ અનુસાર બંને પાર્ટ્સ પર રડાર-અબ્સોર્બિંગ મટિરિયલનો ઉપયોગ કરવામાં આવ્યો હતો, જે F-35ની સ્ટેલ્થ ક્ષમતાનો ભાગ છે. આ કારણે અમેરિકી સુરક્ષા અધિકારીઓ માટે પાર્ટ્સનું ચીન સુધી પહોંચવું ચિંતાનો વિષય બન્યું છે. જોકે ઓસ્ટ્રેલિયાના રક્ષા મંત્રી રિચર્ડ માર્લ્સે કહ્યું છે કે તેમની સમજ મુજબ આ ઘટકોને અત્યંત સંવેદનશીલ ઉપકરણ તરીકે વર્ગીકૃત કરવામાં આવ્યા નથી.
પેન્ટાગોને તપાસ શરૂ કરી
F-35 Joint Program Officeએ શિપમેન્ટમાં થયેલી સમસ્યાની પુષ્ટિ કરી છે. અમેરિકી સત્તાવાળાઓ અને ઉદ્યોગ ભાગીદારો સાથે મળીને પાર્ટ્સ પરત મેળવવા, સમગ્ર ઘટનાની તપાસ કરવા અને ભવિષ્યમાં આવી ઘટના ન બને તે માટે સુરક્ષા વ્યવસ્થા મજબૂત કરવાની કામગીરી ચાલી રહી છે.
F-35 કાર્યક્રમમાં અત્યાર સુધી 1,200થી વધુ વિમાનોનું ઉત્પાદન થયું છે અને 19 દેશોએ તેના ઓર્ડર આપ્યા છે, જેના કારણે આ ઘટનાની આંતરરાષ્ટ્રીય સુરક્ષા અસર અંગે પણ ચર્ચા થઈ રહી છે.
