માતા-પિતાના જન્મસ્થળ અને જન્મતારીખની માહિતી પણ લેવામાં આવશે; AIની મદદથી થશે ડેટા વિશ્લેષણ
નવી દિલ્હી: દેશવ્યાપી જનગણના-2027ના બીજા તબક્કાની શરૂઆત 17 ઓગસ્ટથી થશે. આ જનગણનાની સૌથી મહત્વની વિશેષતા એ રહેશે કે 1931 બાદ પ્રથમ વખત લોકોની જ્ઞાતિની નોંધણી કરવામાં આવશે. ઉપરાંત માતા-પિતાની જન્મ તારીખ અને જન્મ સ્થળની માહિતી પણ એકત્રિત કરવામાં આવશે.
ગૃહ મંત્રાલયની અધિસૂચના મુજબ, 17થી 30 ઓગસ્ટ દરમિયાન નાગરિકો પોતાની વિગતો ઓનલાઈન પણ નોંધાવી શકશે. જ્યારે લદ્દાખ, જમ્મુ-કાશ્મીર, હિમાચલ પ્રદેશ અને ઉત્તરાખંડમાં મેદાની જનગણનાનો તબક્કો 1થી 30 સપ્ટેમ્બર દરમિયાન હાથ ધરાશે.
જનગણના દરમિયાન વ્યક્તિ જે જ્ઞાતિ પોતે જણાવશે તે જ નોંધવામાં આવશે. SC અને ST માટે અલગ સત્તાવાર યાદી ઉપલબ્ધ રહેશે, જ્યારે અન્ય જ્ઞાતિઓ માટે અલગ કોલમ રહેશે. કોઈપણ વ્યક્તિ પાસેથી જાતિ પ્રમાણપત્ર અથવા અન્ય દસ્તાવેજ માંગવામાં આવશે નહીં.
અધિકારીઓના જણાવ્યા મુજબ, 2011ની સામાજિક-આર્થિક અને જાતિ આધારિત ગણતરીમાં 45 હજારથી વધુ અલગ-અલગ જ્ઞાતિના નામ નોંધાયા હતા. આ વખતે આર્ટિફિશિયલ ઈન્ટેલિજન્સ (AI) અને ડિજિટલ ટેક્નોલોજીની મદદથી આ ડેટાનું વધુ અસરકારક વર્ગીકરણ અને વિશ્લેષણ કરવામાં આવશે.
આ જનગણનામાં પ્રથમ વખત માતા-પિતાના જન્મસ્થળ અને જન્મતારીખની માહિતી પણ લેવામાં આવશે. જો ચોક્કસ તારીખની જાણ ન હોય તો માત્ર જન્મવર્ષના આધારે નોંધણી કરવામાં આવશે અને કોઈપણ પ્રકારનો પુરાવો માંગવામાં આવશે નહીં.
સૂત્રોના જણાવ્યા મુજબ, પાસપોર્ટ ધરાવતા લોકોનો પાસપોર્ટ નંબર પણ નોંધાઈ શકે છે, જ્યારે આધાર નંબર આપવો સંપૂર્ણપણે સ્વૈચ્છિક રહેશે.
