વિદેશથી મેડિકલ ડિગ્રી મેળવીને ભારત પરત ફરતા ભારતીય વિદ્યાર્થીઓ માટે સરકાર FMGE પરીક્ષાના નિયમોમાં મહત્વપૂર્ણ ફેરફાર કરવાની તૈયારી કરી રહી છે. હાલ વર્ષમાં બે વખત યોજાતી ફોરેન મેડિકલ ગ્રેજ્યુએટ એક્ઝામિનેશન (FMGE) હવે વર્ષમાં ત્રણ વખત યોજવા અંગે ગંભીરતાથી વિચારણા ચાલી રહી છે. આ ઉપરાંત પરીક્ષાના પ્રશ્નપત્રને પણ નિશ્ચિત પ્રમાણમાં સરળ, મધ્યમ અને અઘરા પ્રશ્નોમાં વહેંચવાની યોજના છે.
જોકે, સરકારી સૂત્રોએ સ્પષ્ટ કર્યું છે કે જૂન 2026માં યોજાયેલી FMGE પરીક્ષામાં વિદ્યાર્થીઓને કોઈપણ પ્રકારના ગ્રેસ માર્ક્સ આપવામાં આવશે નહીં. વિદેશથી મેડિકલનો અભ્યાસ પૂર્ણ કરનારા વિદ્યાર્થીઓએ ભારતમાં મેડિકલ પ્રેક્ટિસ શરૂ કરવા માટે FMGE પાસ કરવી ફરજિયાત છે.
જૂનની પરીક્ષા મુશ્કેલ હોવાનો વિદ્યાર્થીઓનો દાવો
જૂનમાં યોજાયેલી પરીક્ષા ખૂબ મુશ્કેલ હોવાનો દાવો કરીને વિદ્યાર્થીઓ દ્વારા વિરોધ કરવામાં આવી રહ્યો છે. વિદ્યાર્થીઓ જૂન સેશનમાં ગ્રેસ માર્ક્સ આપવાની માંગ કરી રહ્યા છે. જોકે, સરકાર દ્વારા આ માંગ સ્વીકારવામાં નહીં આવે તેવું સ્પષ્ટ કરવામાં આવ્યું છે.
ડિસેમ્બર 2025માં પ્રથમ વખત FMGE આપનારા ઉમેદવારોનો પાસિંગ રેશિયો 47.53 ટકા હતો, જે જૂન 2026માં ઘટીને માત્ર 35.74 ટકા રહ્યો હતો. જૂનની પરીક્ષામાં પાંચ કે તેથી વધુ વખત પરીક્ષા આપી રહેલા ઉમેદવારોનો પાસિંગ રેશિયો પ્રથમ વખત પરીક્ષા આપનારા વિદ્યાર્થીઓ કરતાં વધુ રહ્યો હતો.
દરેક સેશનમાં સરેરાશ 35થી 40 હજાર મેડિકલ ગ્રેજ્યુએટ્સ પરીક્ષા આપે છે, જેમાં લગભગ 10 હજાર વિદ્યાર્થીઓ પ્રથમ વખત FMGEમાં બેસે છે.
પરીક્ષામાં આ ફેરફારોની તૈયારી
સરકાર દ્વારા વિચારણા હેઠળના સંભવિત ફેરફારોમાં—
- FMGE હવે વર્ષમાં 3 વખત યોજવી.
- પ્રશ્નપત્રને ત્રણ કેટેગરીમાં વહેંચવું.
- 30% સરળ, 50% મધ્યમ અને 20% અઘરા પ્રશ્નો રાખવા.
- પરીક્ષા ફીની સમીક્ષા કરવી.
- પરીક્ષા કેન્દ્રોની વ્યવસ્થાને વધુ પારદર્શક બનાવવી.
- વિદ્યાર્થીઓની અન્ય સમસ્યાઓનું નિરાકરણ લાવવું.
આ ફેરફારો અમલમાં આવે તો વિદેશથી મેડિકલ અભ્યાસ પૂર્ણ કરનારા વિદ્યાર્થીઓને FMGE પાસ કરવાની વધુ તકો મળી શકે છે.
UGC-NET સહિતની પરીક્ષાઓનાં પરિણામો આ અઠવાડિયે
બીજી તરફ, નેશનલ ટેસ્ટિંગ એજન્સી (NTA) દ્વારા UGC-NET, CSIR-NET અને ICARની વિવિધ પરીક્ષાઓનાં પરિણામો આ અઠવાડિયે જાહેર કરવાની જાહેરાત કરવામાં આવી છે. NTAના અધિકૃત સોશિયલ મીડિયા હેન્ડલ પર જણાવ્યા મુજબ UGC-NETના 84 વિષયો ઉપરાંત CSIR-NET, ICAR AIEEA (PG) અને ICAR (PhD)ના પરિણામો પણ જાહેર કરવામાં આવશે.
NTAએ ઉમેદવારોને અંતિમ આન્સર કી અને પરિણામ માટે માત્ર તેની અધિકૃત વેબસાઇટ તથા સત્તાવાર સૂચનાઓ પર જ ભરોસો રાખવાની સલાહ આપી છે. ઉલ્લેખનીય છે કે UGC-NET પરીક્ષા 22થી 30 જૂન 2026 દરમિયાન કુલ 87 વિષયો માટે યોજાઈ હતી.
