નવી દિલ્હી: અમેરિકા અને ઇરાન વચ્ચે તણાવ ઘટાડવા માટે શાંતિ મંત્રણાની અટકળો વચ્ચે હોર્મુઝની ખાડીમાં ફરી એક વખત વેપારી જહાજ પર હુમલો થતાં પશ્ચિમ એશિયામાં સુરક્ષાને લઈને ચિંતા વધી છે. હુમલા બાદ વૈશ્વિક શિપિંગ અને ઊર્જા પુરવઠા પર ફરી જોખમ ઊભું થયું છે.
અમેરિકાના રાષ્ટ્રપતિ ડોનાલ્ડ ટ્રમ્પે દાવો કર્યો છે કે ઇરાન સાથે વાતચીત ચાલી રહી છે અને તેહરાન માટે સમજૂતી કરવાની આ “છેલ્લી તક” છે. જોકે, ઇરાને આવા કોઈપણ દાવાને નકારી કાઢતાં જણાવ્યું છે કે અમેરિકા સાથે કોઈ વાટાઘાટો ચાલી રહી નથી અને કોઈ બેઠક પણ નક્કી કરવામાં આવી નથી.
ઇરાનના વિદેશ મંત્રાલયના પ્રવક્તા ઇસ્માઈલ બઘાઈએ સ્પષ્ટ કર્યું કે અમેરિકા સાથે ચર્ચા અંગેના અહેવાલોમાં કોઈ સત્ય નથી.
આ દરમિયાન ઓમાન નજીક હોર્મુઝની ખાડીમાં એક વેપારી કાર્ગો જહાજ અજ્ઞાત પ્રોજેક્ટાઇલથી નિશાન બન્યાની માહિતી સામે આવી છે. બ્રિટનની યુકે મેરિટાઇમ ટ્રેડ ઓપરેશન્સ (UKMTO) એ આ ઘટનાની પુષ્ટિ કરી છે. સુરક્ષા ચિંતાઓને કારણે હોર્મુઝ માર્ગેથી પસાર થતા જહાજોની સંખ્યામાં પણ નોંધપાત્ર ઘટાડો થયો છે.
હોર્મુઝની ખાડી વૈશ્વિક ક્રૂડ ઓઇલ પરિવહન માટે અત્યંત મહત્વપૂર્ણ માર્ગ હોવાથી આ પ્રકારની ઘટનાઓનો સીધો પ્રભાવ આંતરરાષ્ટ્રીય વેપાર અને ઊર્જા બજારો પર પડી શકે છે.
જોકે શરૂઆતમાં તણાવ હળવો થવાની આશાએ આંતરરાષ્ટ્રીય બજારમાં ક્રૂડ ઓઇલના ભાવમાં ઘટાડો અને શેરબજારમાં તેજી જોવા મળી હતી, પરંતુ નવા હુમલાએ ફરી અનિશ્ચિતતાનું વાતાવરણ ઊભું કર્યું છે.
ટ્રમ્પે સોશિયલ મીડિયા પર દાવો કર્યો હતો કે અમેરિકી નૌકાદળનું હોર્મુઝની ખાડી પર સંપૂર્ણ નિયંત્રણ છે અને અમેરિકાની સુરક્ષા ક્ષમતા મજબૂત છે. બીજી તરફ, ઇરાન સતત અમેરિકાના દાવાઓને નકારી રહ્યું છે, જેના કારણે બંને દેશો વચ્ચેના સંબંધોમાં તણાવ યથાવત રહ્યો છે.
