સુપ્રીમ કોર્ટના આદેશ બાદ હોસ્પિટલમાં તપાસ, તબીબોએ હોસ્પિટલમાં દાખલ કરવાની જરૂર ન ગણાવી
ઇસ્લામાબાદ: પાકિસ્તાન તહરીક-એ-ઇન્સાફ (PTI)ના સ્થાપક અને પૂર્વ વડાપ્રધાન ઈમરાન ખાનને સુપ્રીમ કોર્ટના આદેશ બાદ શિફા ઈન્ટરનેશનલ હોસ્પિટલમાં તબીબી તપાસ માટે લઈ જવામાં આવ્યા હતા. 6 ડોક્ટરોની ટીમે તેમના સ્વાસ્થ્યની તપાસ કર્યા બાદ તેમને ફરી અદિયાલા જેલમાં મોકલી દેવામાં આવ્યા છે.
પાકિસ્તાની મીડિયા અહેવાલો અનુસાર, તબીબી તપાસ બાદ ડોક્ટરોએ ઈમરાન ખાનને હોસ્પિટલમાં દાખલ કરવાની જરૂર ન હોવાનું જણાવ્યું હતું. તબીબોના મતે તેમની સ્થિતિ એવી હતી કે તેમને જેલ કસ્ટડીમાં સુરક્ષિત રીતે રાખી શકાય છે. ત્યારબાદ જેલ પ્રશાસને તેમને પરત જેલમાં મોકલ્યા હતા.
અગાઉ ઈમરાન ખાનની તબિયતને ધ્યાનમાં રાખીને સુપ્રીમ કોર્ટે હોસ્પિટલમાં તપાસ અને સારવાર કરાવવાનો આદેશ આપ્યો હતો. પાકિસ્તાનની શાહબાઝ સરકારે આ નિર્ણય સામે પુનર્વિચાર અરજી દાખલ કરી હતી, જોકે રજીસ્ટ્રાર કાર્યાલયે વાંધા સાથે અરજી પરત કરી હતી.
દરમિયાન ઈમરાન ખાનને બની ગાલા ખસેડવા તેમજ વિદેશમાં સારવાર કરાવવાના વિકલ્પો અંગે પણ ચર્ચા થઈ હતી. બીજી તરફ PTI દ્વારા દાવો કરવામાં આવ્યો છે કે જેલની પરિસ્થિતિ તેમના સ્વાસ્થ્ય પર અસર કરી રહી છે.
જોકે, 6 ડોક્ટરોની ટીમની તપાસ બાદ હોસ્પિટલમાં દાખલ કરવાની જરૂરિયાત ન હોવાનું જણાવવામાં આવતા તેમને ફરી અદિયાલા જેલમાં મોકલવામાં આવ્યા છે. હવે ઈમરાન ખાનના સ્વાસ્થ્યને લઈને આગળ તબીબી દેખરેખ કેવી રીતે રાખવામાં આવે છે તેના પર નજર રહેશે.
