નવી દિલ્હી: દેશમાં સૌથી વધુ લોકપ્રિય બનેલી ડિજિટલ પેમેન્ટ સિસ્ટમ UPI અને RuPay ડેબિટ કાર્ડના વ્યવહારોને લઈને ચાર્જની ચર્ચાએ ફરી જોર પકડ્યું છે. એક અહેવાલ મુજબ, કેન્દ્ર સરકારે ₹2,000થી વધુના વ્યવહારો પર મર્ચન્ટ ડિસ્કાઉન્ટ રેટ (MDR) વસૂલવાની મંજૂરી આપી હોવાનો દાવો કરવામાં આવ્યો છે.
અહેવાલમાં જણાવ્યા મુજબ, 14 સપ્ટેમ્બરે બહાર પાડવામાં આવેલા પરિપત્રમાં ₹2,000 સુધીના UPI અને RuPay ડેબિટ કાર્ડ વ્યવહારો પર કોઈ ચાર્જ નહીં વસૂલવાની જોગવાઈ કરવામાં આવી છે. જોકે, ₹2,000થી વધુના વ્યવહારો પર ચાર્જ લાગુ થઈ શકે તેવી ચર્ચા શરૂ થઈ છે.
કેટલો ચાર્જ લાગી શકે?
મર્ચન્ટ ડિસ્કાઉન્ટ રેટ (MDR) હેઠળ ચાર્જ વસૂલવાની સંભાવના વ્યક્ત કરવામાં આવી રહી છે. ઉદ્યોગ સાથે સંકળાયેલા લોકોના મતે આ ચાર્જ 0.25થી 0.4 ટકા સુધી હોઈ શકે છે. જોકે, ચાર્જના ચોક્કસ દર અંગે સત્તાવાર સ્પષ્ટતા જરૂરી છે.
કયા વ્યવહારો પર અસર થશે?
અહેવાલ મુજબ, જો કોઈ ગ્રાહક નોંધાયેલા વેપારી, પેઢી અથવા કંપનીના UPI એકાઉન્ટ પર ₹2,000થી વધુનું પેમેન્ટ કરે તો તેના પર ચાર્જ લાગવાની શક્યતા છે. બીજી તરફ, વ્યક્તિથી વ્યક્તિ વચ્ચેના UPI વ્યવહારો ચાર્જમુક્ત રહેશે.
સરકારના દાવા મુજબ, UPIના કુલ વ્યવહારોમાં આશરે 96 ટકા વ્યવહારો ₹2,000 સુધીના છે, જેમાંથી 86 ટકા વ્યવહારો ₹500 કે તેથી ઓછી રકમના છે. આવા નાના વ્યવહારો પર ચાર્જ નહીં લાગે તેવી વાત કરવામાં આવી છે.
NPCI કરશે દર નક્કી?
મર્ચન્ટ ડિસ્કાઉન્ટ રેટના દર નક્કી કરવાની પ્રક્રિયામાં નેશનલ પેમેન્ટ્સ કોર્પોરેશન ઓફ ઈન્ડિયા (NPCI)ની ભૂમિકા રહેશે. આ અંગે સંબંધિત ક્ષેત્રોના પ્રતિનિધિઓ ધરાવતી UPI અને પેમેન્ટ સર્વિસ સ્ટીયરિંગ કમિટીની બેઠકમાં નિર્ણય લેવાશે.
જોકે, ₹2,000થી વધુના UPI વ્યવહારો પર ચાર્જ લાગુ થવાની વાત અંગે સત્તાવાર પુષ્ટિ જરૂરી છે. હાલ આ મુદ્દે બેન્કો, પેમેન્ટ કંપનીઓ અને વેપારીઓમાં ચર્ચા ચાલી રહી છે.
