નવી દિલ્હીઃ દેશમાં ચોમાસાની અનિશ્ચિતતા અને ક્રૂડ ઓઈલના ઊંચા ભાવ વચ્ચે મોંઘવારીને લઈને ચિંતા યથાવત છે. આ સ્થિતિ વચ્ચે જુલાઈ મહિનાના જથ્થાબંધ ફુગાવાના આંકડામાં થોડી રાહત મળી છે.
જુલાઈમાં જથ્થાબંધ ભાવાંક આધારિત ફુગાવો 9.78 ટકા નોંધાયો છે, જ્યારે જૂનમાં તે 9.87 ટકા હતો. ક્રૂડ ઓઈલના ભાવમાં મળેલી રાહત તેમજ એનર્જી બાસ્કેટમાં દબાણ ઘટવાને કારણે ફુગાવામાં નજીવો ઘટાડો નોંધાયો છે.
જોકે, ખાદ્ય ફુગાવો 6.65 ટકા રહ્યો છે. નવી જથ્થાબંધ ફુગાવા સિરીઝ લાગુ થયા બાદ જૂનમાં ફુગાવો અત્યાર સુધીના ઊંચા સ્તરે પહોંચ્યો હતો, પરંતુ જુલાઈમાં તેમાં થોડો ઘટાડો નોંધાયો છે.
ફ્યુઅલ અને પાવર બાસ્કેટમાં પણ મોટી રાહત જોવા મળી છે. જૂનમાં આ બાસ્કેટનો ફુગાવો 27.41 ટકા હતો, જે જુલાઈમાં ઘટીને 20.05 ટકા થયો છે.
બીજી તરફ, પ્રાથમિક ચીજવસ્તુઓના ભાવમાં વધારો થયો છે. જૂનમાં 7 ટકા રહેલો ફુગાવો જુલાઈમાં વધીને 8.52 ટકા થયો છે.
આમ, જુલાઈમાં એકંદરે જથ્થાબંધ ફુગાવામાં થોડો ઘટાડો થયો છે, પરંતુ ખાદ્ય અને પ્રાથમિક ચીજવસ્તુઓના ભાવમાં દબાણ હજુ પણ ચિંતાનો વિષય છે.
