વહેલી સવારે 6:05 વાગ્યે ધરતી ધ્રૂજી; 10 કિમી ઊંડાઈએ ભૂકંપનું કેન્દ્ર
લેહ: લદાખના લેહ વિસ્તારમાં આજે વહેલી સવારે 5.5ની તીવ્રતાનો ભૂકંપ આવતા લોકોમાં ગભરાટ ફેલાયો હતો. અચાનક ધરતી ધ્રૂજતા અનેક લોકો ઊંઘમાંથી જાગીને સલામતી માટે ઘરની બહાર દોડી આવ્યા હતા.
નેશનલ સેન્ટર ફોર સિસ્મોલોજી (NCS)ના જણાવ્યા મુજબ ભૂકંપ સવારે 6:05 વાગ્યે આવ્યો હતો. ભૂકંપની તીવ્રતા 5.5 નોંધાઈ હતી અને તેનું કેન્દ્ર જમીનથી માત્ર 10 કિલોમીટર ઊંડાઈએ હતું. આટલી ઓછી ઊંડાઈએ ભૂકંપ આવતાં જમીનની સપાટી પર ધ્રુજારી વધુ તીવ્ર અનુભવાઈ શકે છે.
લોકો ઘરની બહાર દોડી આવ્યા
વહેલી સવારનો સમય હોવાથી મોટાભાગના લોકો ઊંઘમાં હતા. ભૂકંપના આંચકાથી લોકો સફાળા જાગી ગયા હતા અને ગભરાટમાં ઘરની બહાર ખુલ્લી જગ્યાએ દોડી આવ્યા હતા. લદાખ ભૂકંપની દૃષ્ટિએ સક્રિય વિસ્તારમાં આવેલું હોવાથી આંચકાને પગલે સ્થાનિકોમાં ચિંતા જોવા મળી હતી.
ચાર કલાક બાદ ફરી 4.3ની તીવ્રતાનો આંચકો
5.5ની તીવ્રતાના ભૂકંપ બાદ લેહ વિસ્તારમાં ફરી એક આંચકો અનુભવાયો હતો. NCS મુજબ સવારે 9:54 વાગ્યે 4.3ની તીવ્રતાનો બીજો ભૂકંપ નોંધાયો હતો. આ ભૂકંપ પણ 10 કિલોમીટર ઊંડાઈએ આવ્યો હતો.
જાનહાનિ કે મોટા નુકસાનના અહેવાલ નહીં
હાલની માહિતી મુજબ ભૂકંપના કારણે જાનહાનિ કે મોટા પ્રમાણમાં મિલકતના નુકસાનના અહેવાલ સામે આવ્યા નથી. જોકે, બે આંચકાના કારણે સ્થાનિકોમાં ભય અને ચિંતા જોવા મળી હતી. અધિકારીઓ અને સંબંધિત એજન્સીઓ પરિસ્થિતિ પર નજર રાખી રહી છે.
